لاہور(زاہد انجم سے) پوسٹ گریجویٹ میڈیکل انسٹی ٹیوٹ کے ہیلتھ ایجوکیشن پروگرام کے تحت پرنسپل امیر الدین میڈیکل کالج پروفیسر ڈاکٹر محمد الفرید ظفر کی ہدایت پر لاہور جنرل ہسپتال کے آؤٹ ڈور میں شہریوں کو موسم کی شدت اور بیماریوں سے بچاؤ بارے آگاہی لیکچرز کا اہتمام کیا گیا تاکہ لوگ احتیاطی تدابیر پر عمل کر کے لوگ اپنی صحت کی حفاظت کو یقینی بنا سکیں۔
اسسٹنٹ پروفیسر آف میڈیسن ڈاکٹر محمد مقصود نے آگاہی لیکچر میں بتایا کہ سرد موسم میں امراض قلب، ہائی بلڈ پریشر اور دیگر بیماریاں بڑھ جاتی ہیں کیونکہ سردی میں پانی اور مشروبات کا استمعال کم ہوجاتا ہے جس سے خون گاڑھا اور خون کی نالیاں سکڑ جاتی ہیں جس سے بلڈ سرکولیشن متاثر ہوتا ہے جو بلند فشار خون، ہارٹ اٹیک اور فالج کا سبب بنتا ہے،
ضرورت اس امر کی ہے کہ امراض قلب اور بلڈ پریشر کے مریض گرم مشروبات، نیم گرم پانی کا استعمال لازمی جاری رکھیں، ڈرائی فروٹ استعمال کریں، جسم کو گرم رکھنے کیلئے گرم کپڑے، جرابیں، سر پر ٹوپی، مفلر پہنیں، سردی اور دھند میں بلا ضرورت باہر نہ نکلیں تاکہ موسم کی شدت انکی صحت کیلئے مسائل پیدا نہ کرے۔
ڈاکٹر محمد مقصود کا کہناتھا کہ شدید سرد موسم میں دھند (فوگ) میں اضافہ ہوگیا ہے، جس کی وجہ سے نزلہ، زکام، فلو، چیسٹ انفیکشن اور بخار، چھوٹے بچوں میں نمونیہ کے کیسز بڑھ رہے ہیں۔ موسمی اثرات سے ضعیف العمر، چھوٹے بچے اور کمزور افراد زیادہ متاثر ہو رہے ہیں۔
انہوں نے مزید کہا کہ چھوٹے بچوں اور بڑی عمر کے افراد کا خصوصی خیال رکھا جائے، گرم کپڑوں، گرم مشروبات کا استعمال کریں۔موٹر سائیکل سوار ہیلمٹ اور فیس ماسک لازمی پہنیں تاکہ سرد ہواؤں اور دھند میں موجود آلودگی سے محفوظ رہ سکیں۔
