کراچی(رپورٹنگ آن لائن) امیر جماعت اسلامی پاکستان حافظ نعیم الرحمٰن نے غزہ سے یکجہتی کے لیے 22 اپریل کو پورے ملک میں شٹر ڈاؤن ہڑتال کا اعلان کرتے ہوئے کہا کہ یہ ہڑتال کسی جماعت کی نہیں فلسطین کے لیے ہوگی۔
کراچی میں جماعت اسلامی کے تحت شاہراہ فیصل پر غزہ یکجہتی مارچ جاری ہے، جس میں خواتین کی بھی بڑی تعداد موجود ہے۔
غزہ یکجہتی مارچ سے خطاب کرتے ہوئے حافظ نعیم الرحمٰن کا کہنا تھا کہ کراچی نے ایک بار پھر ثابت کیا امت مسلمہ کا جیتا جاگتا شہر ہے، اس وقت اہل غزہ جس مصیبت میں ہیں وہ بیان سے باہر ہے۔
انہوں نے کہا کہ فلسطینیوں کی نسل کشی ہورہی ہے اور اقوام متحدہ قراردادیں پاس کررہا ہے جب کہ اسرائیل حماس سے شکست کھا چکا، اب بچوں سے انتقام لے رہا ہے، انشااللہ فلسطین کو آزادی نصیب ہوگی۔
امیر جماعت اسلامی کا کہنا تھا کہ حکمراں بزدلی دکھاتے ہیں کہ معیشت کمزور ہوجائے گی، مطالبہ کیا کہ حکمران اسرائیلی بربریت کے خلاف آواز بلند کریں، وزیراعظم سے کہتا ہوں کہ زبانی باتوں سے کچھ نہیں ہوگا، اجلاس بلائیں۔
انہوں نے کہا کہ مغرب کے چہرے سے نقاب اتر چکا ہے، ہم امریکا اور اسرائیل کی مذمت کرتے ہیں، ہماری مذمت سے امریکا کے سامنے جھکے ہوئے لوگوں کو تکلیف ہے۔
