اسلام آ باد (رپورٹنگ آن لائن) نائب صدر پیپلز پارٹی سینیٹر شیری رحمان نے کہا ہے کہ توشاخانہ تحائف کی تفصیلات چھپانے سے حقیقت نہیں چھپ سکی۔ سماجی رابطے کی ویب سائٹ ٹوئٹر پر اپنے جاری کردہ ٹوئٹ پیغام میں شیری رحمان نے لکھا کہ گزشتہ سال پاکستان انفارمیشن کمیشن سے وزیراعظم کو ملنے والے تحائف کی تفصیلات پوچھی گئی تو حکومت نے صاف انکار کر دیا۔
جاری کردہ پیغام میں شیری رحمان لکھتی ہیں کہ دوسروں کو چور ڈاکو کہنے والوں نے توشاخانہ کی تفصیلات چھپا دیں اور کہا گیا ملنے والی تحائف کی تفصیلات خفیہ ہیں۔ شیری رحمان نے لکھا کہ پی ٹی آئی حکومت نے کہا ریکارڈ باہر نکلے سے پاکستان کے تحائف دینے والے ممالک کے ساتھ تعلقات کو نقصان ہوگا، آپ کو توشاخانہ کی تفصیلات ظاہر کرتے وقت پاکستان کے عالمی ممالک سے تعلقات یاد آئے۔
انہوں نے کہا کہ کرسی بچانے کے لئے آپ نے جلسے میں خط لہراتے وقت پاکستان کے مفاد عالمی ممالک سے تعلقات کے بارے میں ذرا سا بھی نہیں سوچا۔ جاری کردہ ٹوئٹ میں شیری رحمان نے مزید لکھا کہ شفافیت سے بھاگنے کے لئے آپ نے آفیشل سیکرٹ ایکٹ کا سہارا لیا، مسئلہ قانون کے مطابق تحائف خریدنا نہیں، تفصیلات چھپانا اور تحائف کو بیچنا ہے۔ شیری رحمان نے کہا کہ آپ نے کوڑیوں کے دام پر قیمتی تحائف خریدے اور منافع حاصل کیا، جس وقت آپ تحائف خرید کر بیچ رہے تھے اس وقت تفصیلات پوچھنے والوں کو آپ ملک دشمن قرار دے رہے تھے۔ انہوں نے مزید کہا کہ توشاخانہ تحائف کی تفصیلات چھپانے سے حقیقت نہیں چھپ سکی۔
