کراچی(ر پورٹنگ آن لائن) وزیر تعلیم سندھ سعید غنی کہا ہے کہ اسکولوں میں ایس او پیز پر عمل نہیں ہورہا ، ایسا لگ رہا ہے کہ اسکولوں کو بند کرانا پڑے گا، اگر محسوس ہوا کہ چیزیں درست سمت میں نہیں جارہیں تو اسکول بند کرنے میں دیر نہیں کریں گے۔ تفصیلات کے مطابق وزیر تعلیم سعید غنی نے نے ایگرو ٹیکنیکل گورنمنٹ بوائز سیکنڈری اسکول نیوکراچی کادورہ کیا اور اس موقع پر گفتگو کرتے ہوئے انہوں نے کہا کہ نالے پر تجاوزات کے باعث صورتحال انتہائی خراب ہے،
تجاوزات کے خاتمے اور سیوریج کے نظام کو فعال کرنے کے لیے اقدامات شروع کردیے ہیں، ماضی میں یہاں تجاوزات قائم کروا کرپورے نالے کو بند کردیا گیا۔ کورونا سے متعلق ایس او پیز پر بات کرتے ہوئے صوبائی وزیر تعلیم کا کہنا تھا کہ افسوس کی بات ہے کہ اب بھی اسکولز میں ایس اوپیز پر عمل نہیں ہورہا،کل بھی اورنگی ٹاون میں چار اسکولز سیل کیے، ایسا لگ رہا ہے کہ اسکولوں کو بند کرانا پڑے گا۔
سعید غنی نے مزید کہا کہ اسکولوں اور کالجز میں میں کورونا کے ٹیسٹ کرائے گئے ہیں جہاں 13 ہزار طلبہ کے ٹیسٹ کرائے جن میں سے 88 طلبہ میں کورونا کی تصدیق ہوئی، اگر محسوس ہوا کہ چیزیں درست سمت میں نہیں جارہیں تو اسکول بند کرنےمیں دیر نہیں کریں گے، بچوں کی صحت پر کوئی سمجھوتا نہیں کریں گے۔
ان کا کہنا تھا کہ آج بھی اسکولوں کا دورہ کیا تو بچوں نےماسک بھی نہیں پہنے تھے، سرکاری اسکولوں میں بھی ایس او پیزکی خلاف ورزیاں ہورہی ہے، کالجز میں ایس او پیز کی خلاف ورزیاں زیادہ نظر آئیں، این سی او سی اور وزیراعلی سے موجودہ صورتحال پربات کروں گا۔
