اسلام آ باد (رپورٹنگ آن لائن ) وزیر دفاع پرویز خٹک نے کہا ہے کہ اسٹیبلشمنٹ اور حکومت الگ نہیں دونوں کو ساتھ چلنا ہوتا ہے۔ اسلام آباد میں انسداد دہشت گردی عدالت کے باہر میڈیا سے بات کرتے ہوئے پرویز خٹک نے کہا کہ سیاسی جماعتوں کے درمیان ملاقاتیں ہوتی رہتی ہیں، ہمارے اتحادی ہمارے ساتھ ہیں اور ساتھ ہی رہیں گے۔
پرویز خٹک نے کہا کہ ہم شرافت کی سیاست کرتے ہیں، جسے جانا ہے وہ استعفی دے دے ورنہ اس طرح حلقے کے عوام سے دغا ہو گا۔ حکومت سے متعلق پوچھے گئے سوال پر پرویز خٹک نے کہا کہ پتہ نہیں آپ کو کیوں نظر آ رہا ہے کہ حکومت جا رہی ہے؟ میں یقین سے کہتا ہوں کہ حکومت کہیں نہیں جا رہی، وزیر اعظم عمران خان بہت زیادہ پراعتماد ہیں۔
سربراہ پاک فوج سے ملاقات کے حوالے سے سوال پر وزیر دفاع نے کہا کہ آرمی چیف سے ہفتے 20 دن میں ملاقات ہو جاتی ہے۔ صحافی کی جانب سے پوچھا گیا کہ آپ کے ماتحت ادارے واقعی نیوٹرل ہو گئے ہیں؟ جس پر وزیر دفاع نے کہا کہ اسٹیبلشمنٹ اور حکومت الگ الگ نہیں ، دونوں کو ایک ساتھ چلنا ہوتا ہے۔
