اسلام آباد(رپورٹنگ آن لائن)صحافیوں کو ہراساں کیے جانے کے واقعات کا نوٹس لینے کے بعد کسی بینچ کی جانب سے از خود نوٹس کے دائرہ اختیار کے معاملے پر وضاحت فراہم کرنے کیلئے سپریم کورٹ کا 5 رکنی بینچ کل سماعت کریگا ۔
بینچ کی سربراہی قائم مقام چیف جسٹس عمر عطا بندیال کرینگے بینچ کے دیگر اراکین میں جسٹس اعجاز الاحسن، جسٹس منیب اختر، جسٹس قاضی محمد امین اور جسٹس علی مظہر شامل ہیں۔خیال رہے کہ جسٹس قاضی فائز عیسیٰ اور جسٹس جمال خان مندوخیل نے پریس ایسوسی ایشن پاکستان کی درخواست پر نوٹس لیا تھا جس میں صحافیوں کو ہراساں کرنے کے واقعات کا ذکر تھا۔عدالت نے حکومت کے 3 اہم اداروں وفاقی تحقیقاتی ادارے (ایف آئی اے) کے ڈائریکٹر جنرل، اسلام آباد پولیس کے انسپکٹر جنرل (آئی جی) اور سیکریٹری داخلہ کو 26 اگست کو طلب کیا تھا۔
اس کے علاوہ عدالت نے وزارت اطلاعات، داخلہ، مذہبی امور اور انسانی حقوق کے سیکریٹریز، مختلف میڈیا اداروں اور تنظیموں مثلاً کونسل آف نیوز پیپر ایڈیٹرز، آل پاکستان نیوز پیپر سوسائٹی، پاکستان براڈ کاسٹرز ایسوسی ایشن اور پاکستان فیڈرل یونین آف جرنلسٹس کے علاوہ پاکستان الیکٹرانک میڈیا ریگولیٹری اتھارٹی کو بھی نوٹس بھیج تھا کہ بتایا جائے کہ کیا درخواست میں لگائے گئے الزامات درست ہیںتاہم ہفتے کو سپریم کورٹ نے 2 رکنی بینچ کی جانب سے وفاقی، صوبائی حکومتوں، دیگر اداروں کے ساتھ صوبوں اور وفاق کے لا افسران کو بھیجے گئے نوٹس کو مدِ نظر رکھتے ہوئے معاملے کو اسی بینچ کے سامنے 26 اگست کو سماعت کے لیے مقرر کرنے کی ہدایت کی۔
