لاہور (رپورٹنگ آن لائن ) پاکستان مسلم لیگ ن کے صدر اور سابق وزیراعلی پنجاب شہباز شریف نے کہا ہے پراسیکیوشن نے سپریم کورٹ سے ضمانت کے خلاف درخواست واپس لے لی ہے، میرے خلاف آشیانہ اقبال ہاوسنگ ریفرنس کا ایک ایک لفظ جھوٹ اور فراڈ پر مبنی ہے،میں نے اور میری ٹیم نے قوم کا پیسہ بچایا، جس کمپنی کو ہم نے بلیک لسٹ کیا اسے بی آر ٹی کا ٹھیکہ دے دیا گیا۔ تفصیلات کے مطابق لاہور کی احتساب عدالت میں شہباز شریف کے خلاف آشیانہ اقبال ہاوسنگ ریفرنس پر سماعت ہوئی۔
دوران سماعت قومی اسمبلی میں اپوزیشن لیڈر شہباز شریف روسٹرم پر آئے تو جج احتساب عدالت نے ان سے استفسار کیا، میاں صاحب کیسے ہیں آپ؟ جس پر شہباز شریف نے جواب دیا اللہ کا شکر ہے۔ شہباز شریف نے کہا حلفیہ کہتا ہوں کہ میرے خلاف یہ فراڈ کیس بنایا گیا ہے، پراسیکیوشن نے سپریم کورٹ سے ضمانت کے خلاف درخواست واپس لے لی ہے۔
ان کا مزید کہنا تھا کہ اس ریفرنس کا ایک ایک لفظ جھوٹ اور فراڈ ہے، میں نے اور میری ٹیم نے قوم کا پیسہ بچایا۔ انہوں نے کہا کہ جس کمپنی کو ہم نے بلیک لسٹ کیا اسے بی آر ٹی کا ٹھیکہ دے دیا گیا، میٹرو اورنج لائن ٹرین میں عوام کے کڑوروں روپے بچائے۔ سابق وزیراعلی پنجاب کا کہنا تھا کہ میں خطا کار انسان ہوں لیکن میں نے کرپشن نہیں کی، میں نے اورنج لائن ٹرین بنائی اور اچھے کام کی تعریف ہونی چاہیے، خود نمائی نہیں کر رہا لیکن میں نے بہت محنت اور خدمت کی۔
