بیجنگ (رپورٹنگ آن لائن)عوامی جمہوریہ چین کے قیام کی 77ویں سالگرہ کے موقع پر استقبالیہ بیجنگ کے عظیم عوامی ہال میں منعقد ہوا۔ چین کے صدر شی جن پھنگ نے استقبالیے میں شرکت کی اور اہم خطاب کیا۔
انہوں نے زور دیا کہ طویل عرصے کی جستجو اور عملی تجربات کے بعد چینی خصوصیات کے حامل سوشلزم کے نظام نے اپنی عظیم برتری ثابت کی ہے، چین کے قومی طرز حکمرانی کے نظام اور حکمرانی کی صلاحیتوں کی جدیدیت کی سطح مسلسل بلند ہوئی ہے اور چینی قوم کی عظیم نشاۃِ ثانیہ کا حصول ناقابلِ روک عمل بن چکا ہے۔ جب تک ہم پختہ اعتماد کے ساتھ اپنے اہداف پر توجہ مرکوز رکھتے ہوئے قدم بہ قدم ٹھوس انداز میں آگے بڑھتے رہیں گے، کامیابی عظیم کمیونسٹ پارٹی آف چائنا، عظیم چینی عوام اور عظیم عوامی جمہوریہ چین ہی کی ہوگی۔
شی جن پھنگ نے کہا کہ گزشتہ 77 برسوں کے دوران ہماری پارٹی نے عوام کو متحد کرتے ہوئے انتھک جدوجہد کی، جس کے نتیجے میں تیز رفتار اقتصادی ترقی اور طویل مدتی سماجی استحکام کے دو بڑے معجزے رونما ہوئے۔ ہم نے خوشحال معاشرے کی ہمہ گیر تکمیل کے پہلے صد سالہ ہدف کو حاصل کیا اور اب سوشلسٹ جدید طاقتور ملک کی ہمہ گیر تعمیر کے دوسرے صد سالہ ہدف کی جانب بھرپور انداز میں آگے بڑھ رہے ہیں۔ اس وقت ہم دنیا بھر کی توجہ حاصل کرنے والی چین کی عظیم کامیابیوں پر بے حد فخر محسوس کرتے ہیں اور چینی طرز جدیدیت کے روشن مستقبل پر مکمل اعتماد رکھتے ہیں۔
شی جن پھنگ نے زور دیا کہ چین کو آزادانہ اور خودمختار امن پسند خارجہ پالیسی پر کاربند رہنا چاہیے، چار گلوبل انیشی ایٹوز پر عمل درآمد کو آگے بڑھانا چاہیے اور انسانیت کے ہم نصیب معاشرے کی تعمیر کو فروغ دینا چاہیے، تاکہ تغیرات اور انتشار سے دوچار دنیا میں مزید استحکام اور مثبت توانائی شامل کی جا سکے۔
خوشگوار موسیقی کی دھنوں کے درمیان چین اور دیگر ممالک سے تعلق رکھنے والے مہمانوں نے عوامی جمہوریہ چین کے قیام کی 77ویں سالگرہ کی مشترکہ خوشی منائی، چین کی خوشحالی اور عوام کی خوشی و سلامتی کے لیے نیک خواہشات کا اظہار کیا اور چینی عوام اور دنیا کے مختلف ممالک کے عوام کے درمیان دیرپا دوستی کے لیے نیک تمناؤں کا اظہار کیا۔
