لاہور (رپورٹنگ آن لائن)وزیر اطلاعات پنجاب عظمیٰ بخاری نے کہا ہے کہ کسی صوبے کے معاملات میں مداخلت غیر آئینی ہے ،پیپلزپارٹی مسلسل پنجاب کے معاملات میں مداخلت کرکے آئینی اختیارات سے تجاوز کررہی ہے ۔
جو ہر بات پر مرسُو مرسُو کرتے وہ صوبائیت کارڈ کھیل رہے ہیں،آپ تو یا اپنے حواس کھو بیٹھے ہیں یا مریم نواز کی مقبولیت سے خوفزدہ ہیں۔پیپلز پارٹی کے رہنماؤں کے بیانات پر اپنے ردعمل میں عظمیٰ بخاری نے کہاکہ دو ہفتے پہلے میڈیا پر آپ کو کوئی گھاس نہیں ڈالتا تھا.
آج آپ پنجاب کے سیلاب متاثرین اور کسانوں پر فقرے بازی کر کے خبروں میں جگہ بنا رہے ہیں، سندھ میں آپ کی حکومت ہے آپ نے کسانوں سے گندم کیوں نہیں خریدی، اس کا جواب قوم کو دیں۔ پنجاب کا پانی زیر استعمال لانے کیلئے پنجاب کو کسی دوسرے صوبے سے اجازت لینے کی ضرورت نہیں.
پنجاب کے تمام وسائل پر پہلا حق پنجاب کے عوام کا ہے ،مریم نواز پنجاب کے کسانوں کو انکے پانی کا حق ہر صورت دلائے گی۔انہوں نے کہاجس صوبے میں پیپلزپارٹی کی 17 سال سے حکومت ہے وہاں مسائل کے انبار لگے ہیں، پنجاب یاد رکھے گا پنجاب کے عوام مشکل میں تھے تو پیپلز پارٹی نے ان کی مشکلات کا مذاق اڑایا۔
