لاہور (رپورٹنگ آن لائن) وزیر اطلاعات پنجاب عظمیٰ بخاری نے کہا ہے کہ پنجاب حکومت کی کارکردگی کچھ لوگوں کو ہضم نہیں ہو رہی، پی ٹی آئی کا دور حکومت سکینڈلز سے بھرا رہا، پنکی اور گوگی کا رشوت کا بازار گرم تھا۔
ان خیالات کا اظہار انہوں نے لاہور میں پریس کانفرنس کرتے ہوئے کیا ۔انہوں نے کہا کہ پنجاب حکومت کو ایک سال مکمل ہوا، وزیراعلی مریم نواز کی حکومت کا ایک بھی منصوبہ ادھورا نہیں ہے، کوئی بھی منصوبہ ایسا نہیں کہ کہا جارہا ہو شرو ع کریں گے، ہر منصوبے کا بتانے کے لئے دروازے پر دستک نہیں دی جاتی۔
انہوں نے کہا کہ ایک پارٹی کو پنجاب حکومت کی کارکردگی سے بہت مسئلہ ہورہا ہے، عثمان بزدار کو اپنا تعارف کرانے کے لئے شہبازشریف کے نام کی ضرورت پڑتی تھی، پی ٹی آئی والے اپنے دور حکومت میں مریم نواز کو والد کے سامنے گرفتار کرنے میں مصروف تھے، پنکی اور گوگی کا رشوت کا بازار گرم تھا، ان کے دور میں ہرعہدے کا ایک ریٹ مقرر تھا۔عظمیٰ بخاری نے کہا کہ تحریک انصاف کا دور حکومت سکینڈلز سے بھرا رہا.
پی ٹی آئی کے دور میں پیسے لیکر تقررو تبادلے کیے جاتے تھے، پی ٹی آئی کے منصوبوں کا کوئی ریکارڈ نہیں، یہ منصوبے صرف سوشل میڈیا پر تھے،بانی پی ٹی آئی ان کیلئے مہاتما تھے، مہاتما نے خود کہا عثمان بزدار اپنی کارکردگی اشتہارات کے ذریعے بتائیں۔صوبائی وزیر نے کہا کہ تحریک انصاف کے کسی اشتہار پر کوئی بڑا منصوبہ نظر نہیں آئے گا، انہوں نے اپنے دور میں تبدیلی کا پروگرام، 50ہزار گھر،لاکھوں نوکریوں والا اشتہار چھاپا تھا، عثمان بزدار نے اپنے دور میں کچھ کرکے نہیں دکھایا، ان نالائقوں کے پاس فرصت نہیں تھی یہ مصروف تھے۔
انہوں نے کہا کہ پی ٹی آئی کی طرف سے پنجاب حکومت کے خلاف پراپیگنڈا کیا جارہا ہے، انہوں نے 2دن سے ایک مہم شروع کی ہوئی ہے، یہ کہہ رہے ہیں منصوبے پی ٹی آئی کے اورتختی مریم نواز کی، ڈائیلسز کا پروگرام بزدار کا نہیں شہبازشریف نے شروع کیا تھا، وزیراعلی مریم نواز نے ڈائیلسز کارڈ کے لئے 10لاکھ روپے مختص کردیئے ہیں۔عظمیٰ بخاری نے کہا کہ ایئرایمبولینس کے نعرے بھی بہت بار لگے، ایئرایمبولینس کے نعرے پرویزالہی اورعثمان بزدار نے بھی لگائے.
ایئرایمبولینس وزیراعلی مریم نواز حکومت کے پہلے 6ماہ میں لائیں، یہ کسان کارڈ پر بھی بات کرتے ہیں، تحقیقات کے بعد پتہ چلا ان کے کسی منصوبے کی کوئی ڈیٹیل موجود نہیں، آج کسان کارڈ پر ساڑھے 7لاکھ سے زیادہ لوگ اربوں روپے کی خریداری کرچکے ہیں۔انہوں نے مزید کہا کہ گرین بسیں وزیراعلی مریم نوازاپنی حکومت کے پہلے 10ماہ میں لائیں، لاہور کی سڑکوں پر 27گرین بسیں دوڑ رہی ہیں، آئندہ چند ماہ میں 500گرین بسیں مختلف شہروں کیلئے اور آجائیں گی، پنجاب کے اندر 700نئی سڑکیں بن رہی ہیں، وزیراعلی مریم نوازنے صوبے میں اسٹیٹ آف دی آرٹ بی ایچ یوز بنائے ہیں۔
انہوں نے کہا کہ تحریک انصاف والوں کو مریم نواز کی کارکردگی سے آج بہت تکلیف ہورہی ہے، سپیڈو بس پر بھی سوشل میڈیا پر منفی مہم چلائی جارہی ہے،سپیڈو بس شہبازشریف کے دور کی ہے، ان کو سپیڈو بس سروس اپنے نام سے منسوب کرنے پر شرم نہیں آتی، آپ نے کبھی پی ٹی آئی کے لوگوں سے اچھا فیڈ بیک نہیں لیا۔
عظمیٰ بخاری کا مزید کہنا تھا کہ مریم نواز نے ایک سال میں 90سے زائد منصوبے شروع کیے، کسان کارڈ، ایئرایمبولنس اور دھی رانی جیسے پروگرامز عوام کی ضرورت ہیں، مریم نواز نے ایک سال میں 100گھروں کی چابیاں لوگوں کو دیں،10ہزار گھر تکمیل کے آخری مرحلے میں ہیں، مریم نواز نے اپنی کارکردگی سے عوام کے دلوں میں جگہ بنائی۔
