لاہور (رپورٹنگ آن لائن) انصاف ویلفیئر ونگ کے مرکزی سیکرٹری جنرل جمشید اقبال چیمہ نے کہا ہے کہ مسلم لیگ (ن) اور پیپلز پارٹی کے اراکین اسمبلی کی اکثریت ”لیڈر بچاﺅ تحریک “میں ساتھ دینے کی بجائے خاموشی سے بیٹھے ہوئے ہیں ،مشکلات کے باوجود حکومت کو ملنے والی کامیابیوں کے بعد اپوزیشن حواس باختہ ہو چکی ہے ، ٹیکس دینے کی استطاعات رکھنے والوں کو ہر صورت ٹیکس نیٹ میں آنا ہوگا ۔
اپنے ایک بیان میں انہوں نے کہا کہ پاکستان کی تاریخ میں پہلی مرتبہ موجودہ حکومت اصلاحات لے کر آرہی ہے ،یہ یقینا کڑوی گولی ہے جسے نگلے بغیر پاکستان کی معیشت درست سمت میں گامزن نہیں ہو سکتی ۔انہوں نے کہاکہ اپوزیشن اس وقت صرف ”لیڈر بچاﺅ “تحریک چلا رہی ہے اور انہیں اس کے علاوہ کچھ نظر نہیں آرہا۔
اپوزیشن کسی خوش فہمی میں نہ رہے ان کی منفی خواہشات کبھی پوری نہیں ہوں گی۔ انہوں نے کہا کہ ہمیں ہرگز فرینڈلی اپوزیشن نہیں چاہیے ہم تو چاہتے ہیںکہ یہ اپنا اصل کردار ادا کرےںلیکن انہیں چھوڑ دو اور این آر او دے دو کے واویلے سے ہی فرصت نہیں ۔
