لاہور (رپورٹنگ آن لائن) مریم نواز شریف نے مہاجر پرندوں کے عالمی دن کے موقع پر اپنے پیغام میں کہا ہے کہ خوبصورت اور دلکش مہاجر پرندے قدرت کا انمول اور بے مثال عطیہ ہیں، جو دور دراز علاقوں سے آ کر فطرت کی خوبصورتی میں اضافہ کرتے ہیں۔
انہوں نے کہا کہ مہاجر پرندے ماحولیاتی توازن برقرار رکھنے میں اہم کردار ادا کرتے ہیں اور زمین کی زرخیزی میں بھی مددگار ثابت ہوتے ہیں، مہاجر پرندوں کی حفاظت کے لیے قدرتی ماحول کا تحفظ ناگزیر ہے۔
وزیراعلیٰ پنجاب نے کہا کہ مہاجر پرندوں سمیت قدرتی حیاتیاتی اثاثوں کے تحفظ کے لیے پنجاب میں وائلڈ لائف فورس سرگرم عمل ہے جبکہ پرندوں کے غیر قانونی شکار میں ملوث عناصر کے خلاف کریک ڈاؤن جاری ہے۔
انہوں نے مزید کہا کہ پنجاب حکومت مہاجر پرندوں کے محفوظ مسکن، جنگلات کے تحفظ اور جنگلی حیات کو درپیش چیلنجز سے نمٹنے کے لیے ماحول دوست، مؤثر اور دیرپا اقدامات کر رہی ہے۔
مریم نواز شریف نے شہریوں پر زور دیا کہ وہ ذمہ دار شہری ہونے کا ثبوت دیتے ہوئے مہاجر پرندوں اور دیگر جنگلی حیات کے تحفظ میں بھرپور کردار ادا کریں، کیونکہ پرندے فطرت کا حسین ورثہ ہیں اور ان کی حفاظت ہم سب کی مشترکہ ذمہ داری ہے۔
