اسلام آباد (رپورٹنگ آن لائن) وزیراعلیٰ خیبرپختونخوا سہیل آفریدی نے کہا ہے کہ پاکستان میں موسمیاتی تبدیلی ایک اہم ایشو ہے، یہ صرف ایک صوبے یا ملک کا نہیں بلکہ پوری دنیا کا مسئلہ ہے۔
کلائمیٹ کانفرنس میں اپنے ویڈیو پیغام میں وزیر اعلیٰ خیبرپختونخوا سہیل آفریدی کا کہنا تھا کہ بانی پی ٹی آئی نے موسمیاتی تبدیلیوں کے خطرات کے پیش نظر بلین ٹری سونامی منصوبہ شروع کیا۔
انہوں نے کہا کہ خیبرپختونخوا کے کل رقبے میں 37 فیصد جنگلات ہیں، 2017 سے اب تک 6 سو پچاس ارب روپے جنگلات کی کنزرویشن کے لیے لگا چکے ہیں۔
سہیل آفریدی نے کہا کہ یہ پاکستان کا مشترکہ مسئلہ ہے، سنجیدگی سے اقدامات کی ضرورت ہے، خیبرپختونخوا اپنی سطح پر اپنا حصہ ڈال رہا ہے، خیبرپختونخوا جتنے وسائل استعمال کرتا ہے اتنا پروڈیوس بھی کرتا ہے۔
وزیر اعلیٰ خیبرپختونخوا نے کہا کہ قدرتی آفات سے نمٹنے کے لیے پالیسیاں بنانا اور ان پر عملدرآمد وقت کی اہم ضرورت ہے۔
