لاھور(زاھد انجم سے) پرنسپل پوسٹ گریجویٹ میڈیکل انسٹی ٹیوٹ پروفیسر ڈاکٹر سردار محمد الفرید ظفر نے کہا کہ مسیحیوں کیلئے ایسٹر خوشیوں کا تہوار ہے۔ ہر مذہب کے فلسفہ میں انسانیت سے محبت کا پیغام شامل ہے۔
پاکستان میں صحت اورتعلیم سمیت مختلف شعبوں میں مسیحی برادری کی گرانقدرخدمات ناقابل فراموش ہیں۔پاکستان میں ہمیشہ ان کی خدمات کا اعتراف کیاجاتا ہے، پوری قوم ایسٹر کے موقع پر اپنے مسیحی بہن بھائیوں کی خوشیوں میں برابر کی شریک ہے۔
اپنے پیغام میں پروفسیر الفریدظفرنے کہا کہ لاہور جنرل ہسپتال میں مریضوں کی دن رات نگہداشت اور علاج گاہ کو مریض دوست بنانے کے ساتھ صاف ستھرا رکھنے میں مسیحی ملازمین ہمیشہ پیش پیش نظر آتے ہیں۔پرنسپل پی جی ایم آئی نے پاکستان میں رہنے والی مسیحی برادری کے جذبہ حب الوطنی اور ملک کی ترقی اور خوشحالی کے لیے ان کی بے لوث خدمات کو سراہتے ہوئے کہا کہ قومی ترقی میں ان کی خدمات ہماری تاریخ کا روشن باب ہے.
ایم ایس پروفسیر فریاد حسین نے کہا کہ ایسٹر کا تہوار محبت اور انسانیت کے احترام کا درس دیتا ہے ۔ انہوں نے ایسٹر کے تہوار پر مسیحی برادری کو دلی مبارکباد پیش کرتے ہوئے کہا کہ ساری انسانیت کا خالق و مالک ایک ہی ہے۔ اصل خوشی باہم مل جل کر رہنے میں ہے۔
ایم ایس جنرل ہسپتال ڈاکٹر فریاد حیسن نے ایسٹر کے حوالے سے کہا کہ انسانیت کی فلاح و بہبود ہر آسمانی مذہب کا مشترکہ اثاثہ ہے ۔ وطن عزیز کا ہر شہری خواہ اُس کا تعلق کسی بھی مذہب سے ہو وہ پاکستانی ہے اور ملک کی ترقی و خوشحالی کے لئے ہم سب ایک ہی صف میں کھڑے ہیں۔
انہوں نے کہا کہ صحت اور تعلیم کے ساتھ ساتھ ریاست کی تعمیرو ترقی، اس کے دفاع اور عدلیہ میں بھی مسیحی برادری کا کردار قابل قدر ہے جسے ہر سطح پر سراہا جاتا ہے۔ انہوں نے شعبہ طب میں مسیحیوں کی شاندار پیشہ ورانہ خدمات کو سراہتے ہوئے ان کیلئے اپنی نیک تمناؤں کااظہارکیا۔
