لاہور (رپورٹنگ آن لائن )لاہور بورڈ آف انٹرمیڈیٹ اینڈ سکینڈری ایجوکیشن نے گیس پیپرز اور پانچ سالہ سوالیہ پرچے کی سوشل میڈیا ترسیل پر پابندی لگا دی۔لاہور بورڈ نے اس حوالے سے تمام سرکاری اور نجی تعلیمی اداروں کے ایجوکیشن ہیڈز کو مراسلہ جاری کردیا ۔
جس کے مطابق سرکاری اور نجی تعلیمی اداروں کے اساتذہ مختلف واٹس ایپ گروپ چلا رہے ہیں، جن میں لاہور بورڈ کے امتحانات سے متعلق سوالیہ پرچے، گیس پیپر اور پیئرنگ اسکیم کی ترسیل کی جاتی ہے۔سوالیہ پرچے، گیس پیپر اور پیئرنگ اسکیم کی ترسیل کا عمل 1999کے ترمیم شدہ ایکٹ کے مطابق قابل جرم ہے اور ملوث افراد کو 3سال تک قید اور 50ہزار روپے جرمانے کی سزا ہوسکتی ہے۔
لاہور بورڈ کے مطابق تعلیمی اداروں کے سربراہان متعلقہ اساتذہ کو واٹس ایپ گروپ میں لاہور بورڈ کے سوالیہ پرچے شئیر کرنے سے روکیں۔ خلاف ورزی پر قانون کے مطابق سخت ایکشن لیا جائے گا
