اسلام آباد(رپورٹنگ آن لائن)وفاقی وزیر داخلہ محسن نقوی نے کہا ہے کہ حکومت پاکستان انسداد منشیات کے ہر شعبے میں تعاون کو مزید وسعت دینے کیلئے تیار ہے۔
اسلام آباد میں انسداد منشیات کانفرنس میں سیکرٹری داخلہ، خلیجی ممالک کے وفود اور ڈی جی اے این ایف نے بھی شرکت کی۔اس موقع پر محسن نقوی نے کہا کہ ہم عالمی محاذ پر صف اول کے سپاہی بن کر منشیات کے خلاف یہاں اکٹھے ہوئے، خلیجی ممالک کے وفود کی یہاں موجودگی ہمارے مشترکہ عزم کی مظہر ہے۔وزیرداخلہ نے کہاکہ ہم تعاون کو مزید مستحکم، انٹیلی جنس کا تبادلہ اور مؤثر حکمت عملی وضع کریں.
ہم مل کر اس لعنت کے خلاف مؤثر اقدامات کرسکتے ہیں۔انہوں نے کہاکہ انٹیلی جنس شیئرنگ، مشترکہ تربیت اور رابطے کو فروغ دینا چاہتے ہیں، ہم فارنزک و تکنیکی اشتراک جیسے میدانوں میں بھی اشتراک کو فروغ دینا چاہتے ہیں۔محسن نقوی نے کہا کہ خلیجی مالک کی حمایت اور شراکت داری ہماری کامیابی کی ضمانت ہے۔
