کراچی (رپورٹنگ آن لائن)پاکستان کی معروف اداکارہ میرب علی کا کہنا ہے کہ یک طرفہ محبت پر یقین نہیں رکھتی، ایسی محبت کرنی ہی نہیں چاہیے۔
حال ہی میں پاکستان کی معروف اداکارہ میرب علی نے نجی ٹی وی چینل کے پروگرام میں شرکت کی جہاں انہوں نے مختلف معاملات پر بات کی۔
انہوں نے کہا کہ کچھ عرصہ قبل انہوں نے اپنے گھر میں جنات کی موجودگی سے متعلق جو ویڈیو بنائی تھی وہ حقیقی تھی، ان کے گھر میں واقعی جنات یا نظر نہ آنے والی مخلوقات کا سایہ ہے۔
میرب علی نے کہا کہ ان کی ویڈیو وائرل ہو گئی اور اب ان کا وہ گھر فروخت نہیں ہو رہا، کوئی ان کے گھر کو خریدنے کے لیے تیار ہی نہیں لیکن انہوں نے جو باتیں کیں وہ سچی تھیں۔
اداکارہ نے کہا کہ بچپن میں انہیں ٹائیفائیڈ ہو گیا تھا وہ جس لیڈی ڈاکٹر سے صبح و شام ڈرپس لگواتی تھیں انہوں نے انہیں سجاد علی کے گانے کی ویڈیو کے لیے آڈیشن دینے کا کہا اور انہیں وہاں ویڈیو بنا کر بھیجنے کی ہدایت کی۔
انہوں نے نہ چاہتے ہوئے بھی اپنی ویڈیو بنا کر بھیج دی جس پر ان کا انتخاب ہوگیا اور پھر آڈیشن کے بعد انہیں منتخب کر لیا گیا، وہ کئی سال تک ماڈلنگ کرتی رہیں پھر ان کی ماڈلنگ اور انسٹا گرام ویڈیوز پروڈیوسر ثنا شاہنواز نے دیکھیں تو ان سے ڈرامے ’صنف آہن‘ کے لیے رابطہ کیا، ’صنف آہن‘ ان کا پہلا ڈرامہ تھا۔
محبت اور شادی کے معاملے پر بات کرتے ہوئے میرب علی نے کہا کہ وہ یک طرفہ محبت پر یقین نہیں رکھتیں، ایسی محبت کرنی ہی نہیں چاہیے، ایسی محبت کا کیا فائدہ جو عزت نہ دے۔
اداکارہ نے کہا کہ دو طرفہ محبت اچھی ہوتی ہے اور جب بھی کسی کو ایسی محبت ہوجائے تو ایسے افراد کو فوری طور پر شادی کرلینی چاہیے۔
