اسلام آباد (رپورٹنگ آن لائن)قومی کرکٹ ٹیم کے سابق کپتان شاہد آفریدی نے پمز ہسپتال میں نومولود بچوں کی اموات کے واقعے پر افسوس کا اظہار کرتے ہوئے حکمرانوں پر سوال اٹھا دیا ہے کہ سرکاری سکول، ہسپتال اچھے ہیں تو حکمران اپنے بچے وہاںکیوں نہیں بھیجتے؟ ۔
سوشل میڈیا پر جاری بیان میں شاہد آفریدی نے کہا کہ اسلام آباد کے پمز اسپتال میں 14 بچے جان سے چلے گئے، انکوائری رپورٹ سامنے آچکی ہے، متعلقہ افسران کو معطل کرکے ان کے خلاف فوجداری کارروائی کا حکم بھی دیا گیا ہے لیکن کوئی بھی کارروائی ان معصوم جانوں کو واپس نہیں لاسکتی۔
شاہد آفریدی نے حکمرانوں سے سوال کیا کہ اگر سرکاری ہسپتال اور تعلیمی ادارے واقعی اتنے ہی اچھے ہیں تو اقتدار میں بیٹھے لوگ اپنے بچوں کو وہاں کیوں نہیں بھیجتے؟سابق کپتان نے کہا کہ ہر پاکستانی صحت اور تعلیم کے یکساں معیار کا حقدار ہے۔
