اسلام آباد (رپورٹنگ آن لائن)وفاقی وزیر توانائی اویس احمد خان لغاری نے کہاہے کہ گردشی قرضوں کے مسئلے کو حل کرنے کی کوشش کر رہے ہیں ،نیٹ میٹرنگ کے نظام میں بہتری کی ضرورت ہے ،پاور سیکٹر عالمی معیار کے مطابق تکنیکی طور پر مضبوط نہیں،ایندھن کی قیمتوں اور روپے کی قدر میں کمی سے پاور سیکٹر کی کمر ٹوٹ گئی،مقابلہ جاتی توانائی مارکیٹ آئندہ چند ماہ میں شروع ہوگی،پاور سیکٹر میں گورننس، شفافیت اور مالی استحکام کے نئے اقدامات اٹھائے ہیں ، اصلاحات کا عمل جاری ہے، نتائج جلد سامنے آئیں گے۔
پاکستان بزنس کونسل کے سیمینار میں گفتگو کرتے ہوئے انہوںنے کہاکہ ہماری معیشت مضبوط ہورہی ہے،توانائی کے شعبے میں اہم اصلاحات کرچکے ہیں،آئی پی پیز کیساتھ ماضی میں ہونیوالے معاہدے شفاف نہیں تھے،ہم گرین انرجی پر کام کررہے ہیں۔ اویس لغاری نے کہاکہ پاکستان میں صاف انرجی کے فروغ کیلئے اقدامات کر رہے ہیں، پاکستان میں توانائی کے شعبے میں وسیع مواقع موجود ہیں۔ انہوںنے کہاکہ توانائی کے شعبے میں پہلی بار مکمل منصوبہ بندی کیساتھ اصلاحات کیں،گردشی قرضوں کے مسئلے کو حل کرنے کی کوشش کر رہے ہیں ۔ وفاقی وزیر نے کہاکہ حکومت عوام کو سہولت فراہم کرنے کیلئے ہر ممکن کوشش کر رہی ہے،ملک میں متبادل توانائی کے ذرائع میں اضافہ ہو رہا ہے جو کم قیمت بھی ہے۔
اویس لغاری نے کہاکہ ملک میں 19 ہزار میگاواٹ سولر بجلی بن رہی ہے،پاکستان کے توانائی کے شعبے میں پہلی دفعہ مستقبل کیلئے پالیسی بنائی جا رہی ہے۔ وفاقی وزیر نے کہاکہ نیٹ میٹرنگ کے نظام میں بہتری کی ضرورت ہے ۔ انہوںنے کہاکہ معیشت کی بہتری کیلئے مشکل فیصلے بھی کرنے پڑے ہیں ،ڈسٹری بیوشن کمپنیوں کی کارکردگی کو بہتر بنایا جا رہا ہے ۔ انہوںنے کہاکہ توانائی کے شعبے میں نجکاری کا عمل بھی اصلاحات کا حصہ ہے،نجی شعبے کو زیادہ سے زیادہ سہولت فراہم کی جارہی ہے۔ وفاقی وزیر نے کہاکہ انڈسٹری کو بجلی کے نرخوں میں سبسڈی دی جا رہی ہے،پاکستان دنیا میں سولر کے شعبے میں سب سے زیادہ ترقی کر رہا ہے۔
وفاقی وزیر نے کہاکہ پاور سیکٹر عالمی معیار کے مطابق تکنیکی طور پر مضبوط نہیں،ایندھن کی قیمتوں اور روپے کی قدر میں کمی سے پاور سیکٹر کی کمر ٹوٹ گئی۔ وفاقی وزیر نے کہاکہ وزارت توانائی نے 28 اہم اصلاحات کی نشاندہی کر دی،مقابلہ جاتی توانائی مارکیٹ آئندہ چند ماہ میں شروع ہوگی۔ اویس لغاری نے پاور سیکٹر کی سیاست سے علیحدگی حکومت کی بڑی اصلاح قرار دیا اور کہاکہ گردشی قرضے میں نمایاں کمی لائی گئی،آئی پی پیز کے ساتھ معاہدوں کی ازسرِ نو بات چیت کی گئی۔ وفاقی وزیر نے کہاکہ غیر مؤثر بجلی گھروں کی قبل از وقت بندش پر کام جاری ہے ، پاکستان میں قابلِ تجدید توانائی کا حصہ 55 فیصد تک پہنچ گیا۔
وفاقی وزیر نے کہاکہ نیٹ میٹرنگ قوانین میں ترمیم کی تیاری ہے ، ڈسکوز کی نجکاری اور مارکیٹ میں براہِ راست لین دین کا منصوبہ ہے ۔ انہوںنے کہاکہ حکومت اب مستقبل میں بجلی کی براہِ راست خریدار نہیں ہوگی،وزارت نے ریگولیٹری فیصلوں کے مؤثر جائزے کا عمل شروع کر دیا۔ وفاقی وزیر نے کہاکہ پاور سیکٹر میں گورننس، شفافیت اور مالی استحکام کے نئے اقدامات اٹھائے ہیں ، اصلاحات کا عمل جاری ہے، نتائج جلد سامنے آئیں گے
