بیجنگ (رپورٹنگ آن لائن) چین کے نائب وزیر خارجہ میاؤ دہ یو نے درخواست پر خلیج تعاون کونسل کے رکن ممالک کے چین میں تعینات سفیروں سے اجتماعی ملاقات کی۔
بحرین کے چین میں تعینات سفیر ڈاکٹر محمد غسان محمد عدنان شیخو نے خلیجی ممالک کی جانب سے خطے کی موجودہ صورتحال اور خلیج تعاون کونسل کے مؤقف سے آگاہ کیا۔ انہوں نے کہا کہ خلیجی ممالک اپنی قومی سلامتی، علاقائی سالمیت اور شہریوں کے تحفظ کے لیے تمام ضروری اقدامات کریں گے۔ انہوں نے چین کے مؤقف اور اس کی سفارتی کوششوں کو سراہتے ہوئے کہا کہ خلیجی ممالک چین کے ساتھ مل کر کشیدگی کم کرنے اور خطے میں امن کی بحالی کے لیے مزید مشترکہ کوششوں کے خواہاں ہیں۔
میاؤ دہ یو نے ایران کی صورتحال کے حوالے سے چین کے اصولی مؤقف کی وضاحت کرتے ہوئے کہا کہ چین اقوام متحدہ کی سلامتی کونسل کی منظوری کے بغیر کسی خود مختار ریاست کے خلاف فوجی کارروائی کی مخالفت کرتا ہے اور معصوم شہریوں یا غیر فوجی اہداف پر حملوں کی مذمت کرتا ہے۔ انہوں نے کہا کہ چین خلیج تعاون کونسل کے ممالک کی جانب سے اپنی خودمختاری، سلامتی اور علاقائی سالمیت کے تحفظ کی کوششوں کو سمجھتا اور ان کی حمایت کرتا ہے۔ چین ان ممالک کی جانب سے کشیدگی کے دوران تحمل اور مذاکرات کے ذریعے مسائل کے حل کی کوششوں کو بھی سراہتا ہے۔
انہوں نے کہا کہ چین خلیجی ممالک کے ساتھ رابطے اور مشاورت کو مزید مضبوط بنانے کا خواہاں ہے تاکہ جنگ بندی کے فروغ، کشیدگی کے خاتمے اور صورتحال کو مزید بگڑنے سے روکنے کے لیے مشترکہ کوششیں کی جا سکیں۔
