بیجنگ (رپورٹنگ آن لائن)کمیونسٹ پارٹی آف چائنا کی مرکزی کمیٹی کے پولیٹیکل بیورو کا اجلاس منعقد ہوا، جس کی صدارت سی پی سی مرکزی کمیٹی کے جنرل سیکریٹری شی جن پھنگ نے کی۔ جمعہ کے روز اجلاس میں اسٹیٹ کونسل کی جانب سے چودھویں قومی عوامی کانگریس کے چوتھے اجلاس میں منظوری کے لیے پیش کیے جانے والے قومی اقتصادی و سماجی ترقی کے پندرہویں پانچ سالہ منصوبے کے خاکے کے مسودے اور حکومتی ورک رپورٹ کے مسودے پر غور کیا گیا۔
اجلاس میں زور دیا گیا کہ پندرہویں پانچ سالہ منصوبے کے دوران اقتصادی و سماجی ترقی کو آگے بڑھانے کے لیے ہمہ جہت طور پر سوشلسٹ جدید طاقتور ملک کی تکمیل اور دوسرے صد سالہ ہدف کے حصول کو محور بنایا جائے۔ چینی طرز جدیدیت کے ذریعے عظیم قومی نشاۃ الثانیہ کو جامع طور پر آگے بڑھایا جائے، معیشت میں معیار کی مؤثر بہتری کے ساتھ ساتھ مقدار کی منطقی نمو کو یقینی بنایا جائے ، انسانی ترقی کے ہمہ گیر فروغ اور تمام عوام کی مشترکہ خوشحالی میں ٹھوس پیش رفت کی جائے، اور سوشلسٹ جدیدیت کے بنیادی حصول میں فیصلہ کن پیش رفت کو یقینی بنایا جائے۔
اجلاس میں یہ بھی نشاندہی کی گئی کہ رواں سال حکومتی امور کی انجام دہی کے لیے نئے ترقیاتی ڈھانچے کی تشکیل کو تیز کرنا، اعلیٰ معیار کی ترقی کو بھرپور انداز میں آگے بڑھانا اور استحکام کو بنیاد بنا کر پیش رفت کے عمومی اصول پر کاربند رہنا ضروری ہے۔ ساتھ ہی ملکی اور بین الاقوامی دونوں پہلوؤں کو ہم آہنگ انداز میں مدنظر رکھا جائے، ترقی اور سلامتی کے تقاضوں میں بہتر توازن قائم کیا جائے، زیادہ فعال اور مؤثر جامع معاشی پالیسی اختیار کی جائے، سماجی ہم آہنگی اور استحکام کو برقرار رکھا جائے اور پندرہویں پانچ سالہ منصوبے کا مضبوط آغاز یقینی بنایا جائے۔
