اسلام آباد (رپورٹنگ آن لائن)چیئرمین سینیٹ سید یوسف رضا گیلانی نے جعفر ایکسپریس پر حملہ کرنے والے دہشتگردوں کو جہنم واصل کرنے پر سکیورٹی فورسز کو خراجِ تحسین پیش کیا ہے۔
بدھ کو سینیٹ سیکرٹریٹ سے جاری بیان کے مطابق چیئرمین سینیٹ نے کہا کہ سکیورٹی فورسز کے جوانوں نے اپنی جانوں کی پرواہ کئے بغیر دہشتگردوں کے ناپاک عزائم کو خاک میں ملایا۔ ملک کے بہادر جوانوں کی قربانیاں رائیگاں نہیں جائیں گی۔
سید یوسف رضا گیلانی نے کہاکہ قوم اپنے بہادر جوانوں کی بہادری اور قربانیوں کو سلام پیش کرتی ہے۔ دہشتگردوں کے خلاف برسرِ پیکار افواج اور قانون نافذ کرنے والے ادارے ہمارے فخر ہیں۔
پاکستان کے دشمنوں کو ہر محاذ پر شکست دی جائے گی۔ ملک میں امن اور استحکام کے لئےفورسز کی خدمات قابلِ تحسین ہیں۔سید یوسف رضا گیلانی کی سکیورٹی فورسز کے شہدا کو خراجِ عقیدت، زخمی جوانوں کی جلد صحت یابی کی دعا۔
