اسلام آباد(رپورٹنگ آن لائن)چیئرمین سینیٹ سید یوسف رضا گیلانی نے پشاور میں ایف سی ہیڈ کوارٹر پر ہونے والے خودکش حملے کی شدید الفاظ میں مذمت کی ہے۔
پیرکو سینیٹ سیکرٹریٹ سے جاری بیان کے مطابق انہوں نے اس بزدلانہ کارروائی کو ملک کے امن، استحکام اور بہادر سیکورٹی فورسز کے حوصلے کو کمزور کرنے کی ناکام کوشش قرار دیتے ہوئے کہا کہ دہشت گرد کسی رعایت کے مستحق نہیں ہیں۔چیئرمین سینیٹ سید یوسف رضا گیلانی نے شہید ہونے والے ایف سی اہلکاروں کو خراجِ عقیدت پیش کرتے ہوئے کہا کہ قوم اپنے بہادر جوانوں کی لازوال قربانیوں کو ہمیشہ یاد رکھے گی۔
انہوں نے دعا کی کہ اللہ تعالیٰ شہداء کے درجات بلند فرمائے، ان کے اہلِ خانہ کو صبرِ جمیل اور زخمیوں کو جلد صحتِ یابی عطا کرے۔سید یوسف رضا گیلانی نے متعلقہ اداروں کو ہدایت کی کہ زخمیوں کو بہترین طبی سہولیات فراہم کی جائیں اور واقعے کی مکمل تحقیقات کر کے ذمہ دار عناصر کو قانون کے کٹہرے میں لایا جائے۔ انہوں نے کہا کہ دہشت گردی کے خلاف قومی عزم پہلے سے زیادہ مضبوط ہے۔
چیئرمین سینیٹ نے کہا کہ ملک کی سکیورٹی فورسز دہشت گردی کے خاتمے کیلئے کلیدی کردار ادا کر رہی ہیں اور پوری قوم ان کے ساتھ شانہ بشانہ کھڑی ہے۔ انہوں نے کہا کہ دہشت گردی کے مکمل خاتمے تک پاکستان کی ریاست اپنی جدوجہد جاری رکھے گی۔انہوں نے کہا کہ امن دشمن قوتیں پاکستان کی ترقی کی راہ میں رکاوٹیں کھڑی نہیں کر سکتیں۔
