لاہور(رپورٹنگ آن لائن) لاہور ہائیکورٹ نے وزیراعلیٰ پنجاب مریم نواز شریف کی جانب سے چودھری شوگر ملز کیس میں 7کروڑ روپے گارنٹی کی واپسی کے لیے دائر درخواست پر قومی احتساب بیورو (نیب )سے جواب طلب کر لیا۔
چیف جسٹس لاہور ہائیکورٹ جسٹس مس عالیہ نیلم کی سربراہی میں 3رکنی فل بنچ نے کیس کی سماعت کی۔درخواست گزار وزیر اعلیٰ مریم نواز کی طرف سے موقف اپنایا گیا کہ نیب نے چودھری شوگر ملز کیس بے بنیاد قرار دے کر خارج کردیا ہے، چودھری شوگر ملز کیس ختم ہوچکا ہے، گارنٹی کے طور پر رکھوائے گئے 7کروڑ روپے واپس کیے جائیں۔وکیل نیب نے کہا کہ نیب نے کیس ختم کر دیا ہے، اس پر چیف جسٹس عالیہ نیلم نے استفسار کیا کہ کیا متعلقہ ٹرائل کورٹ سے بھی کیس ختم ہو گیا ہے؟
وکیل نے آگاہ کیا کہ قانون کے تحت اس کی ضرورت نہیں ہے۔چیف جسٹس عالیہ نیلم نے کہا کہ نیب نے کیس ختم کر دیا لیکن متعلقہ ٹرائل کورٹ نے بھی حتمی منظوری دینی ہے،نیب چار فروری تک جواب جمع کرائے۔عدالت نے نیب کو نوٹس جاری کرتے ہوئے جواب طلب کر لیا ۔
