لاہور (رپورٹنگ آن لائن) وزیر اطلاعات و ثقافت پنجاب عظمیٰ بخاری نے کہا ہے کہ لاہور میں چائنہ فلم فیسٹیول کا انعقاد پاکستان کی فلم انڈسٹری کے لئے تازہ ہوا کا جھونکا ہے۔
وزیر اطلاعات و ثقافت پنجاب عظمیٰ بخاری نے چائنہ فلم فیسٹیول میں شرکت کی، چینی قونصل جنرل مسٹر ژاﺅ شرین نے وزیر اطلاعات پنجاب کو خوش آمدید کہا۔چائنہ فلم فیسٹیول میں سیکرٹری انفارمیشن طاہر رضا ہمدانی اور چیئرمین الحمرا آرٹس کونسل رضی احمد نے بھی شرکت کی۔
عظمیٰ بخاری نے اس موقع پر گفتگو کرتے ہوئے کہا کہ چین کی پاکستان کے دیگر شعبوں کی طرح فلم انڈسٹری میں شراکت داری قابل تحسین ہے، پاکستان اور چین ملکر چاہیں تو مشترکہ طور پر فلم اور کلچر کے شعبوں میں بڑے پیمانے پر کام کر سکتے ہیں۔
وزیراطلاعات کا کہنا تھا کہ پنجاب حکومت نے فلم انڈسٹری کے ریوائیول کےلئے 8 رکنی کمیٹی تشکیل دے دی ہے، حکومت دیگر شعبوں کی طرح فلم انڈسٹری کو بھی ترقی کرتے دیکھنا چاہتی ہے، فلم انڈسٹری کےلئے گرانٹ وزیراعلیٰ پنجاب مریم نواز کا کلچر کے شعبے میں دلچسپی کا اظہار ہے، پاکستان اور چین ملکر فیچر فلمیں اور اینیمیشن فلمیں بنا سکتے ہیں۔
عظمیٰ بخاری نے مزید کہا کہ لاہور اور بیجنگ میں نئے ٹیلنٹ، اداکاروں، پروڈیوسرز اور تکنیکی ماہرین کی مشترکہ ورکشاپس کا انعقاد کریں گے، لاہور اور شنگھائی میں مشترکہ فلم فیسٹیول کا انعقاد کیا جائے گا، دونوں ملکوں کے لوگ بھی ایک دوسرے کے قریب آئیں گے۔
