لاہور(رپورٹنگ آن لائن)امیر جماعت اسلامی پاکستان حافظ نعیم الرحمن نے کہا ہے کہ پی آئی اے ایک شاندار اور بے مثال ادارہ، پاکستان کا فخر اور کئی بین الاقومی ائیرلائنز کو سپورٹ کرتا تھا، یہ بدنصیبی ہے کہ جن لوگوں نے اپنی نااہلی، بدترین گورننس، سیاسی بھرتیوں اور غلط انتظامی فیصلوں سے اس شاندار ادارے کو تباہ کیا وہی اسے کوڑیوں کے بھاؤ بیچ کر مبارک سلامت کا شور مچا رہے ہیں۔
سماجی رابطوں کی ویب سائٹ ایکس پر قومی ائیر لائن کی فروخت سے متعلق اظہار خیال کرتے ہوئے حافظ نعیم الرحمن نے سوال اٹھایا کہ کیا پی آئی اے کی تباہی کے ذمے داران کا تعین اور احتساب نہیں ہونا چاہیے؟ پہلے چلتے ہوئے منافع بخش ادارے تباہ کرو، پھر انہیں فروخت کرکے جشن مناؤ حکمرانوں کی بدترین ذہنیت کا عکاس ہے۔
امیر جماعت اسلامی نے زور دیا کہ نجکاری کمیشن کے ساتھ ساتھ ایک فیکٹ فائنڈنگ کمیشن بھی بنانا چاہیے جو ان تمام کرداروں اور چہروں کا تعین کرے جنہوں نے پی آئی سمیت نفع بخش قومی ادارے تباہ کرکے پاکستان کو ہزاروں ارب کا نقصان پہنچایا اور قومی وقار کو ضرب لگائی۔
