لاہور(رپورٹنگ آن لائن ) حکومت پنجاب نے صوبے میں لاک ڈاون میں پندرہ روز کی توسیع کرتے ہوئے اس کی مدت تیس جولائی تک بڑھا دی ہے۔تیس جولائی2020 تک تعلیمی ادارے، ہوٹلز اور شادی ہالز بند رہیں گے۔
نوٹیفکیشن کے مطابق عوامی اجتماعات پر بھی پابندی برقرار رہے گی۔سیکرٹری پرائمری اینڈ سکینڈری ہیلتھ کیئرکیپٹن (ر)محمد عثمان کی جانب سے جاری نوٹیفیکیشن کے مطابق30 جولائی تک تعلیمی ادارے، شادی ہال، ریسٹورنٹ اور سینما ہال بدستور بند رہیں گے۔
سماجی و مذہبی اجتماعات، کھیل کی سرگرمیوں کے لیے اکٹھ کی اجازت نہیں ہو گی۔ نوٹیفکیشن کا اطلاق فی الفور ہو گا جو 30جولائی تک نافذ العمل رہے گا۔
سمارٹ لاک ڈاون والے علاقوں کی تواریخ متعلقہ نوٹیفکیشن کے مطابق ہوں گی۔ کھانے پینے کی اشیا اور کریانہ اسٹور صبح 9 سے شام 7 تک، ہفتہ بھر کھلے رہیں گے جب کہ تمام چرچ صرف اتوار کو صبح 7 سے شام 5 بجے تک عبادت کے لیے کھلے رہیں گے
