لاہور(رپورٹنگ آن لائن ) لاہور پولیس کی جانب سے رواں سال پتنگ بازی کے خلاف مختلف کارروائیوں میں 679ملزمان کو گرفتار کرکے 667مقدمات کا اندرج کیا گیا ہے۔
ترجمان لاہور پولیس نے بتایا کہ پتنگ بازی کے خلاف کارروائیوں کے نتیجے میں گرفتار ملزمان کے قبضہ سے22ہزار سے زائد پتنگیں اور847چرخیاں برآمد کی گئی ہیں۔ سٹی ڈویژن میں پتنگ بازی کے142، کینٹ میں 232، سول لائنز میں 41، صدر میں 44، اقبال ٹاؤن میں 91اور ماڈل ٹاؤن میں 129ملزمان گرفتار کئے گئے ہیں۔
سی سی پی او بلال صدیق کمیانہ نے کہا ہے کہ دھاتی ڈور اور پتنگ بازی کے جان لیوا کھیل میں ملوث عناصر کسی رعایت کے مستحق نہیں۔انہوں نے ہدایات جاری کرتے ہوئے کہا کہ انسانی زندگیوں سے کھیلنے والوں کے خلاف بلا امتیاز کارروائی یقینی بنائی جائے۔سی سی پی او لاہور نے کہا کہ پتنگ سازی کے خونی کاروبارمیں ملوث ملزمان کے خلاف انٹیلی جنس بیسڈ کارروائیاں عمل میں لائی جائیں۔
بلال صدیق کمیانہ نے اس عزم کا اظہار کیا کہ کائٹ فلائنگ ایکٹ کے تحت پتنگ بازی میں ملوث افراد کو قانون کے کٹہرے میں لائیں گے۔انہوں نے کہا کہ پتنگ بازی کی روک تھام کے لئے پنجاب سیف سٹیز اتھارٹی کے نیٹ ورک سے بھرپور استفادہ کیا جائے۔انہوں نے مزید کہا کہ والدین اپنے بچوں کو اس خونی کھیل سے روکیں۔
