اسلام آباد (رپورٹنگ آن لائن)وزیراعظم کی زیر صدارت قومی سلامتی کمیٹی کے اہم اجلاس میں پہلگام حملے پر بھارتی الزامات مسترد اور بھارت کی آبی جارحیت پر سخت ردعمل دیتے ہوئے سندھ طاس معاہدہ معطل کرنے کی بھارتی کوشش ناقابل قبول قرار دیدیا جبکہ این ایس سی نے واضح کیا ہے کہ بھارت کی کسی بھی آبی یا سرحدی مہم جوئی کا منہ توڑ جواب دیا جائے گا.
پاکستان دہشتگردی کے خلاف عالمی جنگ میں صف اول کا ملک ہے۔ بدھ کو جاری اعلامیہ کے مطابق پاکستان کا بھارت کے ساتھ تمام دوطرفہ معاہدے معطل کرنے پر غور، شملہ معاہدہ بھی شامل ہے ۔ اعلامیہ میں کہاگیاکہ واہگہ بارڈر فوری طور پر بند، تمام بھارتی ٹرانزٹ معطل کر دیے گئے۔ اعلامیہ میں کہاگیاکہ سارک ویزہ اسکیم کے تحت سوائے سکھ یاتریوں کے جاری بھارتی ویزے منسوخ جبکہ بھارتی دفاعی، فضائی اور بحری مشیروں کو ناپسندیدہ شخصیت قرار دے کر پاکستان چھوڑنے کا حکم دیاگیا ۔
اعلامیہ کے مطابق بھارتی ہائی کمیشن کا عملہ محدود، 30 افراد تک محدود کرنے کا فیصلہ کیا گیا ۔اعلامیہ کے مطابق پاکستانی فضائی حدود بھارتی ایئرلائنز کے لیے فوری بند، بھارت کے ساتھ تمام تجارتی روابط معطل کیا گیا ،اعلامیہ میں کہاگیاکہ بھارت کی اشتعال انگیزیاں دو قومی نظریے کی سچائی کی دلیل ہیں۔ اعلامیہ کے مطابق پاکستان کسی کو اپنی خودمختاری، سلامتی اور وقار پر سمجھوتہ کرنے نہیں دے گا.
بھارت کا کشمیر پر قبضہ، اقوام متحدہ کی قراردادوں کی مسلسل خلاف ورزی ہے۔ قومی سلامتی کمیٹی کے اجلاس میں پہلگام واقعے کو سیاسی مقاصد کے لیے استعمال کرنا بھارت کی گھٹیا سوچ ہے۔ اعلامیہ کے مطابق کلبھوشن یادیو بھارت کی ریاستی دہشتگردی کا زندہ ثبوت ہے۔ اعلامیہ کے مطابق پاکستان دہشتگردی کے خلاف عالمی جنگ میں صف اول کا ملک ہے، بھارتی پراپیگنڈا ناکام ہوگیا ۔
