اسلام آباد(رپورٹنگ آن لائن)صدر مملکت آصف علی زرداری نے کہا ہے کہ پاکستان ہمیشہ سے فلسطینی عوام کے ساتھ ثابت قدمی سے کھڑا رہا ہے، فلسطینیوں کے لئے ہماری حمایت انسانیت، انصاف اور برابری کی بنیادی اقدار پر قائم ہے، پاکستان اور فلسطین کے عوام کے درمیان محبت، احترام اور بھائی چارے کا رشتہ ہے.
مشکل ترین حالات میں بھی پاکستانی قوم نے ہمیشہ اپنے فلسطینی بہن بھائیوں کا ساتھ دیا ہے۔ ایوان صدر کے پریس ونگ کے مطابق صدر مملکت نے بین الاقوامی یوم یکجہتی فلسطین پر اپنے پیغام میں کہا کہ فلسطین کی حمایت پاکستان کی پہچان کا حصہ رہی ہے، یہاں تک کہ پاکستان بننے سے سات سال پہلے 1940ءکی قرارداد لاہور میں بھی فلسطین کے حقِ خودارادی کی واضح حمایت شامل تھی۔
انہوں نے کہا کہ آج بین الاقوامی یوم یکجہتی فلسطین کے موقع پر میں بہادر فلسطینی عوام کو دل کی گہرائیوں سے سلام پیش کرتا ہوں جنہوں نے بے مثال ہمت، ثابت قدمی اور غیر متزلزل حوصلے کے ساتھ تاریخ میں ایک نیا باب رقم کیا ہے۔ صدر مملکت نے کہا کہ پاکستان فلسطین کے ساتھ اپنے دیرینہ اور قریبی برادرانہ تعلقات کو بہت اہمیت دیتا ہے۔
صدر آصف علی زرداری نے کہا کہ پاکستان نے ہمیشہ غزہ میں اسرائیلی قابض فوج کے مظالم کی شدید مذمت کی ہے اور ہر عالمی فورم پر فلسطینیوں کے لیے آواز اٹھائی ہے۔ ہم مسلسل فوری اور مستقل جنگ بندی، انسانی امداد کی بلا رکاوٹ فراہمی، شہریوں کے تحفظ اور اسرائیلی جنگی جرائم پر مکمل احتساب کا مطالبہ کرتے رہے ہیں۔ انہوں نے کہا کہ اقوام متحدہ، او آئی سی، آئی سی جے اور دیگر عالمی فورمز پر بھی پاکستان فلسطینی عوام کے بنیادی اور ناقابل تنسیخ حقوق کے لیے مسلسل سرگرم رہا ہے۔
صدر مملکت نے کہا کہ غزہ امن معاہدے میں بھی پاکستان نے مثبت اور تعمیری کردار ادا کیا، اس امید کے ساتھ کہ اسرائیلی ظلم و جارحیت سے فلسطینی عوام پر ڈھائے گئے ناقابل تصور دکھوں کا خاتمہ ہوسکے گا۔ انہوں نے کہا کہ پاکستان اپنے فلسطینی بھائیوں اور بہنوں کی ہر طرح کی سیاسی، سفارتی، انسانی اور اخلاقی حمایت جاری رکھے گا، ہم اپنے اس موقف کا اعادہ کرتے ہیں کہ فلسطین جون 1967ءسے پہلے والی سرحدوں کے مطابق ایک آزاد، خودمختار اور مضبوط ریاست کے طور پر قائم ہو اور اس کا دارالحکومت القدس الشریف ہو۔ صدر مملکت نے دعا کرتے ہوئے کہا کہ فلسطینی عوام کی جدوجہد اور ہمت دنیا کے سوئے ہوئے ضمیر کو جگا دے اور دنیا میں انصاف اور امن کی جیت ہو۔ انہوں نے کہا کہ میری یہ دلی خواہش بھی ہے کہ ایک دن مجھے مسجد اقصیٰ میں اپنے فلسطینی بھائیوں کے ساتھ نماز ادا کرنے کی سعادت حاصل ہو۔
