اسلام آباد (رپورٹنگ آن لائن)وفاقی وزیر داخلہ محسن نقوی اور آسٹریلیا کے وزیر داخلہ ٹونی برک کے درمیان وڈیو لنک کے ذریعے اہم ملاقات ہوئی، جس میں باہمی دلچسپی کے امور اور سکیورٹی تعاون پر تفصیلی تبادلہ خیال کیا گیا۔وڈیو کانفرنس میں پاکستان اور آسٹریلیا کے درمیان غیر قانونی امیگریشن کی روک تھام کے لیے اشتراکِ کار بڑھانے پر اتفاق کیا گیا۔ دونوں ممالک نے اس بات پر زور دیا کہ انسانی اسمگلنگ اور غیر قانونی نقل و حرکت کے خلاف مشترکہ حکمتِ عملی اپنائی جائے گی۔
وڈیو کانفرنس کے دوران پولیس اور پیرا ملٹری فورسز کے افسران کی ادارہ جاتی استعداد کار میں مزید بہتری کے لیے تربیتی پروگرامز شروع کرنے پر بھی بات چیت کی گئی ۔ اس کے علاوہ نیشنل سائبر کرائمز انوسٹی گیشن ایجنسی اور ایف آئی اے کے ساتھ آسٹریلوی اداروں کے درمیان تعاون بڑھانے کے امکانات پر بھی گفتگو ہوئی۔دونوں وزرائے داخلہ نے دوطرفہ تعاون کو مزید مؤثر بنانے کے لیے مشترکہ ورکنگ گروپ قائم کرنے کا فیصلہ بھی کیا۔
ملاقات میں آسٹریلیا کی کرکٹ ٹیم کے آئندہ دورۂ پاکستان کے حوالے سے بھی تبادلہ خیال کیا گیاجس پر وزیر داخلہ محسن نقوی نے آسٹریلوی ہم منصب کو ٹیم کے لیے کیے جانے والے سکیورٹی انتظامات سے آگاہ کیا۔آخر میں وفاقی وزیر داخلہ محسن نقوی نے آسٹریلوی وزیر داخلہ کو پاکستان کا دورہ کرنے کی باضابطہ دعوت دی جبکہ دونوں وزرائے داخلہ نے دوطرفہ تعلقات کو مزید مضبوط اور مستحکم بنانے کے عزم کا اعادہ کیا۔
