اسلام آباد (رپورٹنگ آن لائن)وزیراعظم محمد شہباز شریف نے ڈیرہ اسماعیل خان میں پولیس کے تربیتی مرکز پر فتنہ الخوارج کے دہشت گرد حملے کی شدید مذمت کرتے ہوئے کہا ہے کہ دہشت گردوں کی ایسی بزدلانہ کارروائیاں دہشت گردی کے خلاف ہمارے عزم کو متزلزل نہیں کر سکتیں، ملک سے ہر قسم کی دہشت گردی کے مکمل خاتمے کے لئے پر عزم ہیں۔
ہفتہ کو وزیر اعظم آفس کے میڈیا ونگ سے جاری بیان کے مطابق وزیراعظم نے خوارجی دہشت گردوں کا بہادری سے مقابلہ کرتے ہوئے شہید ہونے والے سات پولیس اہلکاروں کو خراج عقیدت پیش کیا۔ اس موقع پر وزیراعظم نے شہداء کی بلندی درجات کی دعا کرتے ہوئے ان کے اہل خانہ سے تعزیت کا اظہار کیا۔وزیراعظم نے حملے میں زخمی ہونے والوں کی جلد صحت یابی کی دعا اور انہیں ہرممکن طبی امداد فراہم کرنے کی بھی ہدایت کی۔
وزیر اعظم محمد شہباز شریف نے کہا کہ خیبر پختونخوا کی پولیس دہشت گردی کے خلاف جنگ میں ہمیشہ فرنٹ لائن پر رہی ہے،پوری قوم شہداء کو سلام پیش کرتی ہے،دہشت گردوں کی ایسی بزدلانہ کارروائیاں دہشت گردی کے خلاف ہمارے عزم کو متزلزل نہیں کر سکتیں،ملک سے ہر قسم کی دہشت گردی کے مکمل خاتمے کے لئے پر عزم ہیں۔
