اسلام آباد (رپورٹنگ آن لائن)وزیراعظم محمد شہباز شریف نے ’’راست‘‘ (RAAST) کے بورڈ ممبران کو نئی ذمہ داریاں سنبھالنے پر مبارکباد دیتے ہوئے ہدایت کی ہے کہ ملک بھر کے کاروباری افراد کو ’’راست‘‘ پلیٹ فارم کے استعمال کی ترغیب دینے کی کوششیں مزید تیز کی جائیں۔
وزیراعظم آفس کے میڈیا ونگ کی طرف سے جاری بیان کے مطابق وزیراعظم کی زیرصدارت جمعرات کو یہاں ’’راست‘‘ کے بورڈ ممبران کے ساتھ اجلاس منعقد ہوا جس میں وفاقی وزیر برائے خزانہ محمد اورنگزیب، وفاقی وزیر اطلاعات و نشریات عطاء اللہ تارڑ، وفاقی وزیر اقتصادی امور احد خان چیمہ، وفاقی وزیر انفارمیشن ٹیکنالوجی شزا فاطمہ خواجہ، وزیر مملکت برائے خزانہ بلال اظہر کیانی، گورنر سٹیٹ بینک، راست بورڈ کے ممبران ، سی ای او اور اعلیٰ سرکاری افسران نے شرکت کی۔
وزیراعظم نے اس توقع کا اظہار کیا کہ قومی اہمیت کے حامل اس ادارے کو مزید بہتر انداز میں چلایا جائے گا۔ انہوں نے کیش لیس معیشت اور مالیاتی شمولیت کے فروغ میں ’’راست‘‘ کے کلیدی کردار کو اجاگر کرتے ہوئے ہدایت کی کہ ملک بھر کے کاروباری افراد کو ’’راست‘‘ پلیٹ فارم کے استعمال کی ترغیب دینے کی کوششیں مزید تیز کی جائیں۔اجلاس میں وزیراعظم کو ’’راست‘‘ کی کارکردگی پر بریفنگ میں بتایا گیا کہ ’’راست‘‘ کے اجراء سے اب تک تقریباً 80 کھرب روپے کی 3 ارب سے زائد ٹرانزیکشنز مکمل ہو چکی ہیں، ’’راست‘‘ کے صارفین کی تعداد 48 ملین سے تجاوز کر چکی ہے جبکہ ملک بھر کے 53 مالیاتی ادارے ’’راست‘‘ کا حصہ ہیں۔
وزیراعظم کو بتایا گیا کہ ’’راست‘‘ سٹیٹ بینک آف پاکستان کا ادارہ ہے تاہم ایک ممبر کے علاوہ تمام بورڈ ممبران نجی شعبے سے وسیع تجربے کی بنیاد پر منتخب کیے گئے ہیں، ملک بھر میں تمام جی ٹو بی اور بی ٹو جی ادائیگیوں کو ’’راست‘‘ پر منتقل کرنا ادارے کا وژن ہے، ’’راست‘‘ کے ذریعے ہر فرد کو محفوظ اور قابل اعتماد ڈیجیٹل ادائیگی کا پلیٹ فارم فراہم کیا گیا ہے۔
