اسلام آباد (رپورٹنگ آن لائن)وفاقی وزیر داخلہ محسن نقوی نے 1948 میں پیرکلیوا محاذ کے ہیرو نائیک سیف علی جنجوعہ شہید نشان حیدر کو زبردست الفاظ میں خراج عقیدت پیش کرتے ہوئے کہا ہے کہ نائیک سیف علی جنجوعہ شہید نے دشمن کی پیش قدمی روک کر عسکری تاریخ میں بہادری و شجاعت کی مثال قائم کی۔
اتوار کو وزارت داخلہ سے جاری بیان میں وفاقی وزیر نے کہا کہ نائیک سیف علی جنجوعہ شہید نے دشمن کی یلغار روک کر تاریخ میں جرات کا ناقابل فراموش باب رقم کیا، بہادر سپوت دشمن کی گولہ باری کے باوجود مورچے سے پیچھے نہ ہٹے اور زخمی ہو کر بھی چٹان کی طرح ڈٹے رہے۔ محسن نقوی نے کہا کہ نائیک سیف علی جنجوعہ شہید کا وطن پر قربان ہونے کا غیرمتزلزل عزم آج بھی زندہ جاوید ہے، نائیک سیف علی جنجوعہ شہید نے دشمن کی پیش قدمی روک کر عسکری تاریخ میں بہادری و شجاعت کی مثال قائم کی،نائیک سیف علی جنجوعہ کی قربانی نے ثابت کیا کہ سپاہی بندوق کے ساتھ جذبہ ایمانی کے ساتھ لڑتے ہیں۔
انہوں نے کہا کہ نائیک سیف علی جنجوعہ کی عظیم قربانی آج بھی ہر جوان کے جذبے کو یقین، عزم اور قوت عطا کرتی ہے، نائیک سیف علی جنجوعہ شہید جیسے سپوت پاکستان کی مسلح افواج کا مان ہیں۔یاد رہے کہ نائیک سیف علی جنجوعہ شہید پیر کلیوہ راجوری کی چوٹی پر بھارتی فوج کے ایک بریگیڈ کا مقابلہ ایک پلاٹون کی نامکمل اور مختصر نفری کے ساتھ کیااور بھارتی بریگیڈ کو پسپا کرتے ہوئے شہید ہو گئے۔ اسی طرح انھوں نے مشین گن سے دشمن کا ایک جہاز بھی مار گرایا تھا۔
