لاہور (رپورٹنگ آن لائن) وزیر جنگلات پنجاب سبطین خان نے کہا ہے کہ وزیر اعظم عمران خان کا گرین پنجاب پر زیادہ فوکس ہے۔ تفصیلات کے مطابق وزیر جنگلات سبطین خان سے محکمہ جنگلات کے ڈی ایف اوز کی ملاقات ہوئی جس میں وزیر جنگلات نے محکمہ جنگلات کے افسران کو گرین پاکستان ویثرن پر کام کی رفتار تیز کرنے کی ہدایات دی ہے۔
وزیر جنگلات سبطین خان نے کہا کہ آئندہ سال تک پورے پنجاب میں حقیقی معنوں میں سبز تبدیلی دکھائی دینی چاہئے، محکمہ جنگلات کے کام کی تعریف لوگوں کی زبانی سننا چاہتا ہوں۔ سبطین خان نے کہا کہ عام عوام کو بھی شجرکاری مہم میں شامل کرنے کیلئے لائحہ عمل طے کیا جائے، پودوں کی کاشت اور شجرکاری کی مانیٹرنگ کا عمل تیز اور مزید بہتر کیا جائے۔
سبطین خان نے مزید ہدایت دیتے ہوئے کہا کہ نرسریوں میں پلانٹنگ اسٹاک میں کمی نہیں آنی چاہئے، وزیر اعظم پاکستان کا گرین پنجاب پر زیادہ فوکس ہے، گرین پنجاب ویثرن کے شاندار نتائج چاہتا ہوں، وزیر اعظم مجھ سے شجرکاری کی باقاعدگی سے رپورٹ لے رہے ہیں۔ وزیر جنگلات نے کہا کہ شجرکاری اہداف کے حصول کیلئے شجرکاری سرگرمیوں کی خود مانیٹرنگ کروں گا، وزیر اعظم پاکستان خود بھی شجرکاری عمل کا باقاعدگی سے جائزہ لے رہے ہیں۔
سبطین خان نے کہا کہ وزیر اعظم کو مایوس نہیں کریں گے، شجرکاری کے حیران کن نتائج دیں گے ، افسران نے مون سون شجرکاری مہم میں بھی حیران کن حد تک تاریخی نتائج دیے ہیں ، اسپرنگ شجرکاری میں بھی سابقہ مہم جیسے نتائج کی توقع رکھتا ہوں۔ انہوں نے مزید کہا کہ اسپرنگ شجرکاری کے دوران نرسریوں میں پلانٹنگ اسٹاک ہر صورت مکمل رکھا جائے۔
