اسلام آباد (رپورٹنگ آن لائن)وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے کہا ہے کہ نوجوان پاکستان کی تعمیر نو کے سب سے بڑے شراکت دار ہیں،معاشرے سے نفرت اور انتشار کی آوازوں کو ختم کرنا اور نوجوانوں کو امن، یکجہتی اور یگانگت کا سفیر بنانا ہوگا۔
اڑان پاکستان مباحثہ 2025 کی تقریب سے خطاب کرتے ہوئے انہوں نے کہا کہ یہ مباحثہ ملک میں نئی فکری قیادت پیدا کرنے کا اہم پلیٹ فارم ہے، پروفیسر احسن اقبال نے کہا کہ ہم ایک نئی فکری اور اخلاقی بیداری کی بنیاد رکھ رہے ہیں، آج کی تقریب میں پاکستان کے تمام خطوں کی نمائندگی اس بات کا ثبوت ہے کہ نوجوان ایک روشن مستقبل کی تشکیل میں بھرپور کردار ادا کرنے کے لیے پرعزم ہیں۔ انہوں نے نوجوانوں کو مخاطب کرتے ہوئے کہا کہ آپ کی نظر 2047 کے پاکستان پر ہونی چاہیے کیونکہ پاکستان اور اس کے ہمسایہ ممالک آزادی کے 100 سالہ جشن کی تیاری کر رہے ہوں گے۔ا نہوںنے کہاکہ جس طرح قوم نے ماضی میں معرکہ حق میں دشمن کو شکست دی اسی طرح معرکہ ترقی میں بھی کامیابی حاصل کی جائے گی۔
پروفیسر احسن اقبال نے کہا کہ کامیاب قومیں امن، استحکام، پالیسی کا تسلسل اور مسلسل اصلاحات کے ذریعے ترقی کرتی ہیں، ہم نوجوانوں کو وہ علم فراہم کر رہے ہیں جو ان میں تخلیقی صلاحیتیں پیدا کرے اور انہیں نئی ٹیکنالوجیز کے دور کے تقاضوں کے تحت نالج لیڈر بنائے، نوجوانوں کو علم اور تخلیق کی پرواز سے ستاروں تک پہنچانا ہمارا مقصد ہے۔وزیر منصوبہ بندی نے کہا کہ اڑان پاکستان دراصل اْس ادھورے خواب کا تسلسل ہے جو وژن 2025 کے تحت دیکھا گیا تھا۔ انہوں نے بتایا کہ پاکستان کی سٹاک ایکسچینج، آئی ٹی سیکٹر، برآمدات اور بیرونی ترسیلات سمیت ہر شعبے میں ریکارڈ ترقی ہوئی ہے، پاکستان اب تاریخ کی ”چوتھی اڑان” بھرنے کے لیے تیار ہے.
اس اڑان کو پائیدار، فیصلہ کن اور بلند بنانے کے لیے تمام طبقات کو مل کر کام کرنا ہوگا۔پروفیسر احسن اقبال نے کہا کہ نوجوان پاکستان کی تعمیر نو کے سب سے بڑے شراکت دار ہیں، انہیں قومی ترقی کے عمل میں شریک کرنے کے لیے مختلف پروگرام شروع کیے جا چکے ہیں۔ انہوں نے زور دیا کہ معاشرے سے نفرت اور انتشار کی آوازوں کو ختم کرنا اور نوجوانوں کو امن، یکجہتی اور یگانگت کا سفیر بنانا ہوگا۔ا نہوںنے کہاکہ اڑان پاکستان درحقیقت جوان پاکستان ہے، ملک چھوڑ کر بھاگنے کے بجائے اپنی مادروطن کے معمار بنیں، پاکستان میں ہر خواب کی تعبیر محنت اور لگن سے ملتی ہے۔
