لاہور(رپورٹنگ آن لائن)پاکستان مسلم لیگ (ن) لاہور کے صدر ملک سیف الملوک کھوکھر کی جانب سے ضمنی انتخابات میں مسلم لیگ (ن) کی بھرپور کامیابی کی خوشی میں جشن منانے کی تقریب کا انعقاد کیا گیا .
اس موقع پر کارکنان اور عوام میں مٹھائی تقسیم کی گئی ، کارکنان ڈھول کی تھاپ پر بھنگڑے ڈالتے ہوئے قیادت کے حق میں نعرے لگاتے رہے ۔
ملک سیف الملوک کھوکھر نے تقریب سے خطاب کرتے ہوئے کہا کہ کامیابی سے ثابت ہوگیا ہے کہ شیر جیت کا نشان ہے ،ضمنی انتخابات میں بھرپور کامیابی عوام کا مسلم لیگ (ن) اور اس کی حکومت پر اعتماد کا واضح اظہار ہے.
ہم عاجزی کے ساتھ ملک کی ترقی اور عوام کی خدمت کا سلسلہ جاری رکھیں گے بلکہ اس میں مزید بہتری لائی جائے گی ۔ سیف الملوک کھوکھر نے کہا کہ ضمنی انتخابات میں عوام نے انتشار اور فساد والوں کو مسترد کر کے کارکردگی کو ووٹ دیا.
مسلم لیگ (ن) نے پہلے عوام کو مایوس کیا اور نہ آئندہ کرے گی بلکہ قائد نواز شریف کی قیادت میں وزیر اعظم شہباز شریف ملک کو ایشین ٹائیگر بنانے کے لئے پرعزم ہیں جبکہ صوبے میں وزیر اعلیٰ پنجاب مریم نواز شریف ترقی اور خدمت کے نئے ریکارڈ قائم کر رہی ہیں ۔ انہوں نے کہاکہ ان شا اللہ بلدیاتی انتخابات میں بھی مسلم لیگ (ن) کے حمایت یافتہ امیدوار اسی طرح کامیابی حاصل کریں گے۔
