ماروی پسنجر، ثمن سرکار ایکسپریس کل سے چلانے کا فیصلہ

لاہور (رپورٹنگ آن لائن ) پاکستان ریلوے نے میرپور خاص اور کھوکھراپار کے درمیان چلنے والی ماروی پسنجر جبکہ حیدر آباد اور میرپور خاص کے درمیان چلنے والی ثمن سرکار ایکسپریس کو 15اکتوبر سے دوبارہ بحال کرکے چلانے کا فیصلہ کرلیا۔

ترجمان ریلوے کے مطابق کل 15اکتوبر کو ماروی پسنجر (336 ڈاون)شام 5بجے میرپورخاص سے روانہ ہوکر رات 8 بجکر 40 منٹ پر کھوکھراپار ریلوے اسٹیشن پہنچے گی جبکہ ثمن سرکار ایکسپریس (115 اپ) سہ پہر 3 بجکر 45 منٹ پر حیدرآباد سے روانہ ہوکر شام 4 بجکر 55 منٹ پر میرپور خاص پہنچے گی۔

ماروی پسنجر (335 اپ) کھوکھرا پار سے 16 اکتوبر کو صبح 6 بجے روانہ ہو کر اپنے راستے سے ہوتی ہوئی صبح 9 بجکر 40 منٹ پر میرپورخاص پہنچے گی جبکہ ثمن سرکار ایکسپریس (156 ڈاون) میرپورخاص سے صبح 10بجے روانہ ہو کر صبح 11 بجکر 10 منٹ پر حیدرآباد پہنچا کرے گی۔ یہ دونوں ٹرینیں 16اکتوبر سے روزانہ کی بنیاد پر چلا کریں گی۔ دونوں ٹرینیں 5 اکانومی کوچز پر مشتمل ہوں گی۔