لاہور (رپورٹنگ آن لائن) پاکستان مسلم لیگ ن کے نائب صدر اور اپوزیشن لیڈر پنجاب اسمبلی حمزہ شہباز شریف نے کہا ہے کہ برف میں پھنسنے کے باعث مری میں ابھی تک 20 سے زائد افراد کے جاں بحق ہونے کی اطلاعات ہیں۔ اپنے ایک بیان میں انہوں نے کہا کہ سوگوار خاندانوں کے ساتھ اظہار تعزیت کرتے ہوئے دعا کرتا ہوں کہ اللہ تعالی انہیں صبر جمیل عطا فرمائے ، رات کو لوگ سردی سے ٹھٹھر کر مرتے رہے اور پنجاب حکومت اور انتظامیہ نیند کے مزے لوٹتی رہی۔
حمزہ شہباز شریف نے کہا ہے کہ ایک لاکھ سے زائد گاڑیوں کو مری میں داخلے کی اجازت ہی کیوں دی گئی؟ اگر حکومت گاڑیوں کا داخلہ روکنے میں ناکام رہی تو پھر پھنسے ہوئے افراد کو ریسکیو ہی کر لیا جاتا ، کیا وزیراعلی کا ہیلی کاپٹر عوام کی جانیں بچانے کے لئے استعمال نہیں ہو سکتا تھا؟ ۔
مسلم لیگ ن کے نائب صدر نے کہا ہے کہ پوری انتظامی مشینری کو انسانی جانیں بچانے پر کیوں نہیں لگایا گیا ، رات جب ہلاکتوں کی خبریں آنا شروع ہو گئیں تب بھی نااہل حکومت کے کان پر جوں نہ رینگی ، حکومت کی سنگ دلی، بے حسی اور نااہلی کے باعث یہ انسانی سانحہ ہوا ہے۔ انہوں نے کہا کہ اس سے قبل ڈینگی کے سلسلے میں بھی نا اہلی کے باعث 26 ہزار سے زائد کیسز اور 150 کے قریب ہلاکتیں ہوئیں ، یہ حکومت لوگوں کی جان کا تحفظ کرنے میں پوری طرح سے ناکام ہو چکی ہے ، کٹھ پتلی وزیراعلی اور اسلام آباد میں بیٹھ کر ڈوریں ہلانے والا وزیراعظم اس المیے کے ذمہ دار ہیں۔
اپوزیشن لیڈر پنجاب اسمبلی حمزہ شہباز شریف نے کہا ہے کہ لوگوں کی جان بچانے میں ناکامی پر ان تمام افراد کو استعفی دینا چاہیے۔
