میاں تنویر سرور
تفصیلات کے مطابق ڈائریکٹر جنرل ایکسائز اینڈٹیکسیشن پنجاب عمر شیرچٹھہ کی کی ہدایات پر ڈائریکٹر انفورسمنٹ اینڈ آڈٹ پنجاب نے اپنی ٹیم کے ہمرا ہ لاہور میں محکمے کے دونوں ریجنز اے اور بی میں محض تین پراپرٹی ٹیکس زونز میں پراپرٹی ٹیکس کے 360غیر تشخیص شدہ یونٹ پکڑ لیے ہیں۔جس سے قومی خزانے کو 50کروڑروپے سے زائد کا نقصان بتایا جارہا ہے۔ٹیکس چوری کی اس واردات میں ماضی قریب میں چار ہزار3سو گاڑیوں کی بوگس رجسٹریشن کے مقدمے میں ملوث ای ٹی او عدیل امجد مرکزی کردار بتائے جارہے ہیں۔
ذرائع کے مطابق ڈائریکٹر جنرل ایکسائز اینڈٹیکسیشن کی تشکیل کردہ خصوصی ٹیم نے ریجن اے کے11میں سے محض ایک پراپرٹی ٹیکس زون 13جبکہ ریجن بی لاہور کے 9پراپرٹی ٹیکس زونز میں سے زون 14اور زون15کے مخصوص پراپرٹی ٹیکس سرکلز میں سرپرائز چیکنگ کی تو بڑی تعداد میں ٹیکس نیٹ میں دانستا”شامل نہ کیئے جانے والے 360پراپرٹی یونٹ سامنے آگیئے۔غیر مصدقہ تخمینے کے مطابق ٹیکس چوری کی اس واردات میں قومی خزانے کو مجموعی طورپر 50کروڑ روپے سے زائد کا ریونیو نقصان بتایا گیا ہے۔
ادھر زرائع کا کہنا ہے کہ سب سے زیادہ ٹیکس چوری ای ٹی او عدیل امجدکے پراپرٹی ٹیکس زون 15کے سرکل کینال ویو میں سامنے آئی ہے۔جہاں خاتون انسپکٹر نازیہ اشرف تعینات ہیں۔جنہیں پیڈا یکٹ 2006کے سیکشن 7 کی کلاز بی کے تحت نوٹس جاری کرنے کا حکم دیدیا گیا ہے۔جبکہ ڈائریکٹر جنرل نے ای ٹی او عدیل امجد سے ٹیکس چوری پر تحریری وضاحت طلب کرلی ہے۔اسی طرح ریجن بی کے پراپرٹی ٹیکس انسپکٹر منورحسین کو سنٹرل پارک اور سیف علی کوفیروز پورروڈ پر واقع جائیدادوں کو ٹیکس نیٹ میں دانستا”شامل نہ کرنے پر سیکشن 7کی کلاز بی کے تحت نوٹس جاری کرنے کا حکم دیدیا گیا ہے۔یہ نوٹسز ڈائریکٹر ریجن بی لاہور احمد سعید جاری کرینگے۔زرائع کے مطابق ریجن بی میں پراپرٹی ٹیکس کے مجموعی طورپر 267یونٹ غیر تشخیص شدہ چھوڑے گیئے۔جبکہ لاہور ریجن اے میں پراپرٹی ٹیکس کے مجموعی طورپر 93یونٹ چھوڑے گیئے ہیں۔جبکہ پراپرٹی ٹیکس زون 13میں تعینات خاتون ای ٹی او افشاں بی بی سے بھی تحریری وضاحت طلب کرلی گئی ہے۔
علم میں یہ بھی آیا ہے کہ ڈی جی ایکسائز کی ٹیم مزید پراپرٹی ٹیکس زونز میں متحرک ہے اور عنقریب بہت سے سکینڈل سامنے آنے والے ہیں۔جبکہ عدیل امجد اور دیگر نے خود کو بچانے کے لیے ڈی جی ایکسائز عمر شیر چٹھہ پر مختلف زرائع سے دباو ڈالنا بھی شروع کردیا ہے
