غزہ(رپورٹنگ آن لائن)فلسطینی تنظیم فتح تحریک کے ترجمان اور فلسطینی قومی کونسل کے رکن جمال نزال نے کہا ہے کہ قاہرہ میں موجود فلسطینی وفد ریاستِ فلسطین کی نمائندگی کر رہا ہے، نہ کہ فتح تحریک کی۔
ان کا کہنا تھا کہ فلسطینی گروہوں بشمول حماس، سے رابطے کے لیے جو وفد تشکیل دیا گیا ہے اس کی نوعیت مختلف ہے۔انہو ںنے بتایا کہ ریاستِ فلسطین کا وفد مصر کے اعلی حکام سے مذاکرات کے لیے قاہرہ پہنچا ہے۔ ان کے مطابق فلسطینی مصالحت اور قومی تقسیم کے خاتمے کے لیے عالمی حمایت میں اضافہ ہو رہا ہے۔
فتح کے ترجمان نے مزید کہا کہ وفد کل قاہرہ سے واپس آنے کے بعد اپنی بات چیت کی تفصیلات فلسطینی قیادت کے سامنے پیش کرے گا۔ انھوں نے اس بات پر زور دیا کہ فتح تحریک فلسطینی اتحاد کی خواہاں ہے اور اس قومی مقصد پر تحریک کے اندر کوئی اختلاف نہیں۔
