اسلام آباد(رپورٹنگ آن لائن)قائد مسلم لیگ( ن) نواز شریف نے پاکستان ڈیمو کریکٹ موومنٹ(پی ڈی ایم)کے سربراہ مولانا فضل الرحمان کو ٹیلی فون کر کے ملکی سیاسی صورت حال پر تبادلہ خیال کیا،
نواز شریف اور فضل الرحمان کے درمیان ٹیلی فونک تبادلے میں لانگ مارچ کی کامیابی کے لیے مختلف تجاویز پر غور کیا گیا،نواز شریف نے لانگ مارچ کامیاب بنانے کے لیے فضل الرحمان کو (ن) لیگ کے تعاون کی یقین دہانی کروا دی،ٹیلی فونک گفتگو میں نواز شریف اور مولانا فضل الرحمان نے اس بات پر اتفاق کیا کہ سینیٹ انتخابات مشترکہ طور پر لڑے جائیں یہ بھی طے پایا کہ پی ڈی ایم جماعتیں ایک دوسرے کے مقابلے میں امیدوار نہیں لائینگی،
دونوں رہنماﺅں نے سینیٹ انتخابات کے حوالے سے منظر عام پر آنے والی ویڈیو کی وجہ سے پیدا ہونے والی صورتحال پر بھی تبادلہ خیال کیا،دونوں رہنماﺅں نے اتفاق کیا کہ سینیٹ الیکشن میں جامع حکمت عملی کے تحت حصہ لیں گے، نجی ٹی وی کے مطابق مولانا فضل الرحمان کا کہنا تھا کہ ہمیں کرپٹ اور چور کہنے والوں کے اپنے ممبران کرپٹ نکلے، انہوں نے کہا پی ٹی آئی کے جہاز پر سوار ہونے والوں کی لینڈنگ شروع ہو گئی ہے۔
