کراچی(رپورٹنگ آن لائن) جماعت اسلامی سندھ کے امیر وسابق ایم این اے محمد حسین محنتی نے کہا ہے کہ ظالم اورظلم کے خلاف ڈٹ جانے کانام حسینیت ہے،حسینیت حق اورباطل یزیدیت کانام ہے،واقعہ کربلاء درس انقلاب ہے جو اسلامی حکومت کے قیام کے لیے جدوجہد اور یزیدی صفت حکمرانوں کیخلاف ڈٹ جانے کا نام ہے،
نواسہ رسولﷺ حضرت امام حسین رضہ نے اپنے خاندان سمیت دین حق کے لیے جام شہادت نوش کرکے پوری دنیا کو یہ پیغام دیا ہے کہ کفر کی حکومت تو چل سکتی ہے مگر ظلم کی نہیں،انسانیت اور اسلام کے دشمنوں نے آج کشمیر، برما، فلسطین سمیت پوری دنیا میں ظلم وبربریت سے معرکہ کربلا پربا کررکھا ہے اس لیے حق وسچ کا ساتھ اور ظلم کیخلاف ڈٹ جانا ہی پیغام شہادت حسین رضہ ہے۔
انہوں نے یوم عاشور کے موقع پر جاری اپنے پیغام میں مزید کہا کہ حق وباطل کا معرکہ ازل سے ابد تک جاری رہے گا، مقبوضہ کشمیر میں بھارتی ظلم اور کرفیو کو آج تیرہ ماہ گزرگئے یہ بدترین ریاستی دہشتگردی ہے، کشمیر کی افسوس ناک صورتحال پر انسانی حقوق کی تنظیمیں وعالمی ضمیر کی خاموشی لمحہ فکرہے۔
