اسلام آباد(رپورٹنگ آن لائن) صدر مملکت آصف علی زرداری نے پولینڈ کے یوم آزادی پر پاک فضائیہ کی تشکیل میں اہم کردار ادا کرنے والے پولش انجینئروں، پائلٹوں اور ٹیکنیشنز کو خراج عقیدت پیش کیا ہے۔
صدرِ پاکستان کی جانب سے پولینڈ کے عوام کو 107ویں یومِ آزادی کی مبارک باد دی گئی اور کہا گیا کہ پاکستان اور پولینڈ کے تعلقات 1962 سے باہمی احترام و تعاون پر قائم ہیں، دونوں ممالک کے درمیان تعلقات تجارت، دفاع، تعلیم اور ثقافت تک وسیع ہو چکے ہیں۔
صدرِ مملکت نے وارسا میں جولائی 2025 میں منعقدہ سیاسی مشاورت کے نویں دور کو سراہا اور کہا کہ توانائی، زراعت، سائنس و ٹیکنالوجی اور تعلیم میں تعاون بڑھانے کے لیے پرعزم ہیں۔
آصف علی زرداری نے کہا کہ پولینڈ کے ماہرین نے ابتدائی برسوں میں پاک فضائیہ کی تشکیل میں اہم کردار ادا کیا، دونوں ممالک کے باہمی تعلقات میں مزید فروغ کے خواہش مند ہیں، پولینڈ کے عوام کی خوشحالی و فلاح کے لیے نیک خواہشات رکھتے ہیں۔
