لاہور ( رپورٹنگ آن لائن) لاہور ہائیکورٹ نے سیلاب زدگان کو امداد سے روکنے کے خلاف درخواست ناقابلِ سماعت قرار دے دی۔چیف جسٹس لاہور ہائیکورٹ مس عالیہ نیلم نے شہری غلام محی الدین کی جانب سے سیلاب زدگان کو براہِ راست امداد دینے سے روکنے کے خلاف دائر درخواست پر سماعت کی۔
چیف جسٹس عالیہ نیلم نے کیس کو بطور اعتراض سنا۔درخواست گزار کے وکیل محمد آفتاب باجوہ نے موقف اپنایا کہ پنجاب حکومت، چیف سیکرٹری اور آئی جی پنجاب نے براہِ راست امدادی سرگرمیوں پر پابندی عائد کی ہے اور متاثرین تک امداد پہنچنے میں رکاوٹیں ڈالی جا رہی ہیں۔ درخواست میں موقف اختیار کیا گیا کہ اس اقدام سے متاثرین مزید مشکلات کا شکار ہو رہے ہیں۔
سماعت کے دوران چیف جسٹس عالیہ نیلم نے ریمارکس دیئے کہ سوشل میڈیا رپورٹس پر عدالت یقین نہیں کر سکتی، یہ فیک بھی ہو سکتی ہیں۔کیوں نہ بے بنیاد درخواست دائر کرنے پر آپ کو جرمانہ کیا جائے؟۔چیف جسٹس نے واضح کیا کہ درخواست کے قابلِ سماعت ہونے پر رجسٹرار آفس کا اعتراض درست ہے اور عدالت اس اعتراض کو برقرار رکھتی ہے۔
