اسلام آباد (رپورٹنگ آن لائن)قومی اسمبلی کے سپیکر سردار ایاز صادق نے جنوبی افریقہ کے خلاف ٹی ٹوئنٹی سیریز میں شاندار کامیابی پر پاکستان کرکٹ ٹیم کو دلی مبارکباد پیش کی ہے۔
انہوں نے کھلاڑیوں کی بہترین ٹیم ورک، نظم و ضبط اور شاندار کارکردگی کو سراہتے ہوئے کہا کہ قومی ٹیم کی یہ فتح پوری قوم کے لیے بے حد فخر اور خوشی کا باعث ہے۔سردار ایاز صادق نے کہا کہ ہمارے کھلاڑیوں نے ایک بار پھر اپنے غیر معمولی ٹیلنٹ اور عزم و حوصلے کا مظاہرہ کرتے ہوئے قومی پرچم کو سربلند کیا ہے۔
انہوں نے قومی ٹیم کی صلاحیتوں پر بھرپور اعتماد کا اظہار کرتے ہوئے کہا کہ پاکستانی کرکٹرز میں دنیا کی کسی بھی ٹیم کو شکست دینے کی مکمل قابلیت موجود ہے۔اسپیکر قومی اسمبلی نے ٹیم کے لیے نیک تمناؤں کا اظہار کرتے ہوئے امید ظاہر کی کہ پاکستان کرکٹ ٹیم جذبے، لگن اور اتحاد کے اسی تسلسل کے ساتھ کامیابیوں کا سفر جاری رکھے گی اور ملک و قوم کا نام مزید روشن کرے گی۔
