اسلام آباد (رپورٹنگ آن لائن )سردی کی شدت میں اضافہ ہوتے ہی ایل پی جی کی طلب بھی بڑھ گئی،ضلعی انتظامیہ اسلام آباد کی جانب سے مہنگی ایل پی جی فروخت کرنے والوں کے خلاف کریک ڈائون شروع کر دیاگیا جس کے تحت سرکاری ریٹ 200 روپے سے مہنگی ایل پی جی بیچنے والی 90 سے زائد دکانیں سیل کر دی گئیں۔
تفصیلات کے مطابق ضلعی انتظامیہ ٹیمز کی جانب سے شہر بھر میں ایل پی جی قیمتوں کا خفیہ سروے کیا گیا ،سروے رپورٹ پر سوہان، بارہ کہو، کھنہ پل، سرائے خربوزہ ،صنم چوک، شمس کالونی، برما ٹاؤن، سوہان گارڈن، ترنول اور مختلف سیکٹرز میں اسسٹنٹ کمشنرز نے کارروائیاں کیں ۔سرکاری ریٹ 200 روپے سے مہنگی ایل پی جی بیچنے والی 90 سے زائد دکانیں سیل کر دی گئیں۔
اسسٹنٹ کمشنرز کی جانب سے دکانیں سیل کرنے کے ساتھ بھاری جرمانے بھی عائد کئے گئے،ایل پی جی بیچنے والوں کے لیے سرکاری ریٹ لسٹ آویزاں کرنا لازمی قرار دیاگیا ،ڈی سی اسلام آباد نے شہریوں سے مہنگی ایل پی جی بیچنے والوں کی نشاندہی کی اپیل کی ۔ ڈی سی اسلام آباد نے کہاکہ سرکاری قیمت 200 روپے سے مہنگی ایل پی جی بیچنے والوں کی شہری نشاندہی کریں
