لاہور(رپورٹنگ آن لائن ) پاکستان مسلم لیگ(ن)کی ترجمان مریم اورنگزیب نے کہا ہے کہ دھکے کی میٹرو اور دھکے کی حکومت نہیں چل سکتی، ووٹ چور سلیکٹڈ جعلی وزیراعظم شہباز شریف پر کیس بناتا ہے، میڈیکل رپورٹ پہلے عمران خان صاحب کے پاس جاتی ہے، ان کے حکم پر شہباز شریف کی رپورٹ دینے میں تاخیر کی گئی،جو رپورٹ ٹھیک نہیں آرہی وہ جان بوجھ کر نہیں دی گئی۔
ترجمان پاکستان مسلم لیگ نون مریم اورنگزیب نے میڈیا سے گفتگو کرتے ہوئے کہا کہ پی ڈی ایم عوام کی جیبوں پر ڈاکہ ڈالنے والوں کیخلاف ہے، مارکیٹ سے آٹا غائب کر کے بحران پیدا کیا گیا، یہ 52 روپے کی چینی 120 روپے میں فروخت کر رہے ہیں، شہباز شریف کو 27 ارب کی میٹرو بنانے پر گرفتار کیا گیا، بی آر ٹی اور حکومت دھکے کے بغیر نہیں چلتی، جلسہ چھوٹا تھا تو کرائے کے ترجمان ہلکان کیوں ہیں۔
انہوں نے کہا کہ حکومت کو مہنگائی اور مسائل کی نہیں، پی ڈی ایم کی فکر ہے، کشمیر کو بھارت کی جھولی میں پھینک دیا گیا۔مریم اورنگزیب نےکہا کہ ووٹ چور سلیکٹڈ جعلی وزیراعظم شہباز شریف پر کیس بناتا ہے، میڈیکل رپورٹ پہلے عمران خان صاحب کے پاس جاتی ہے۔ انہوں نے کہا کہ عمران خان کے حکم پر شہباز شریف کی رپورٹ دینے میں تاخیر کی گئی اور جو رپورٹ ٹھیک نہیں آرہی وہ جان بوجھ کر نہیں دی گئی۔ لیگی ترجمان کا کہنا تھا کہ دھکے کی میٹرو اور دھکے کی حکومت نہیں چل سکتی۔
