اسلام آباد(رپورٹنگ آن لائن ) وفاقی وزیرداخلہ شیخ رشید نے کہا ہے کہ حکومت کی رٹ ہر حال میں قائم کی جائے گی‘ 20 اپریل تک کالعدم تحریک لبیک پاکستان کو تحلیل کردیں گے، تنظیم کے تمام اکاﺅنٹس منجمد جبکہ سربراہ اور رہنماﺅں کے شناختی کارڈ بلاک کئے جائیں گے‘ 20اپریل کو راولپنڈی اسلام آباد کا کوئی راستہ بند نہیں ہوگا‘
وزیراعظم نے ناموس رسالت سے متعلق اہم بیان دیا ہے جس میں کہا گیا ہے کہ نبی کریم کی شان میں گستاخی کسی صورت قبول نہیں‘ جہانگیر ترین تحریک انصاف کا حصہ ہیں اور پارٹی میں ہی رہیں گے ‘ جہانگیر ترین کا معاملہ بھی جلد ٹھنڈا ہوجائے گا‘ عوام کو سستے بازاروں کے ذریعے ریلیف دے رہے ہیں‘ عوام کوسستی اشیا مہیا کر رہے ہیں۔
اتوار کو وزیر داخلہ شیخ رشید نے اسلام آباد کے سیکٹر جی سیون ٹو میں قائم سستے بازار کا دورہ کیا ۔ اس موقع پر ڈپٹی کمشنر حمزہ شفقات بھی ان کے ہمراہ تھے جنہوںنے وزیر داخلہ کو رمضان سستا بازار سے متعلق تفصیلی بریفنگ دی۔ بعد ازاں میڈیا سے گفتگو کرتے ہوئے وزیرداخلہ کا کہنا تھا کہ عمران خان مہنگائی کنٹرول کرنے کےلیے اقدامات کررہے ہیں، عوام کو سستے بازاروں کے ذریعے ریلیف دے رہے ہیں، عوام کوسستی اشیا مہیا کریں گے۔
وزیرداخلہ کا کہنا تھا کہ ٹی ایل پی نے ملک کی 192 جگہوں کو بند کیا تھا، جن میں سے 191 جگہیں کلیئر کرادی گئی ہیں، اس وقت صرف لاہور یتیم خانہ چوک بند ہے اور اب بھی حالات کشیدہ ہیں، کالعدم تحریک لبیک والے کسی صورت اپنے ایجنڈے سے پیچھے ہٹنے کو تیار نہیں، ان کے ساتھ کوئی مذاکرات نہیں ہو رہے۔
شیخ رشید کہنا تھا کہ ہم ذہنی طور پر تیار نہیں تھے اس لئے تحریک لبیک کے خلاف ایسے اقدامات کرنا پڑے، 20 اپریل تک کالعدم ٹی ایل پی کو تحلیل کردیں گے، ان کے اکانٹ منجمد اور شناختی کارڈ بھی بلاک ہوں گے، اور اس کے کے خلاف مزید کارروائی سے متعلق ایک ماہ میں کابینہ فیصلہ کرے گی، 20 اپریل کو راولپنڈی اسلام آباد کے شہریوں کو راستے کھلے ملیں گے۔
وزیراعظم نے کل ناموس رسالتﷺ سے متعلق اہم بیان دیا کہ کسی صورت گستاخی کو قبول نہیں کریں گے۔ شیخ رشید نے کہا کہ جہانگیر ترین پارٹی کا حصہ ہیں، امید ہے ساتھ ہی رہیں گے، مجھے یقین ہے جہانگیر ترین کا معاملہ بھی ٹھنڈا ہوجائے گا۔
