لاہور(رپورٹنگ آن لائن)وفاقی وزیر برائے ریلوے محمد حنیف عباسی نے بدھ کے روز یہاں پنجاب کی سینئر وزیر برائے اطلاعات و ثقافت مریم اورنگزیب سے ملاقات کی جس میں پاکستان ریلوے اور پنجاب حکومت کے اشتراک سے جاری اور مجوزہ ترقیاتی منصوبوں پر تفصیلی تبادلہ خیال کیا گیا۔ملاقات کے دوران دونوں رہنمائوں نے ریلوے کے مختلف انفراسٹرکچر منصوبوں خصوصا آٹھ برانچ لائنز کی اپ گریڈیشن سے متعلق امور کا جائزہ لیا۔
اس موقع پر غیر محفوظ اور غیر نگرانی شدہ لیول کراسنگز کو محفوظ بنانے اور ان کی جدید خطوط پر اپ گریڈیشن سے متعلق پیش رفت پر بھی غور کیا گیا۔ مزید برآں، پنجاب ٹورازم ڈیپارٹمنٹ کے اشتراک سے لاہور، راولپنڈی اور ٹیکسلا ریلوے اسٹیشنز کی تزئین و آرائش کے منصوبے پر بھی تفصیلی بات چیت ہوئی۔
مریم اورنگزیب نے بتایا کہ ٹورازم ڈیپارٹمنٹ کی جانب سے ان اسٹیشنز کا ماڈل تیار کرلیا گیا ہے اور جلد عملی کام کا آغاز متوقع ہے۔اجلاس میں گرین کوریڈور منصوبے پر بھی پیش رفت کا جائزہ لیا گیا، جو شاہدرہ سے کوٹ لکھپت ریلوے ٹریک کے ساتھ ایک جدید اور ماحول دوست منصوبہ ہے، اس حوالے سے محکمہ جنگلات کے تعاون سے ریلوے لائن کے ساتھ درختوں کی قطاروں میں شجرکاری کے منصوبے پر بھی گفتگو ہوئی۔
دونوں وزراء نے لاہور تا راولپنڈی فاسٹ ٹرین منصوبے کی پیش رفت پر بھی تبادلہ خیال کیا اور اس عزم کا اظہار کیا کہ اس منصوبے کو جلد از جلد پایہ تکمیل تک پہنچایا جائے گا تاکہ عوام کو تیز، محفوظ اور جدید سفری سہولت فراہم کی جا سکے۔
ملاقات کے اختتام پر مریم اورنگزیب اور محمد حنیف عباسی نے ریلوے کے تمام ترقیاتی منصوبوں کو وفاقی و صوبائی سطح پر قریبی تعاون کے ساتھ آگے بڑھانے پر اتفاق کیا۔ دونوں رہنمائوں نے کہا کہ ریلوے کا جدید، ماحول دوست اور سیاحت کو فروغ دینے والا نظام پاکستان کے معاشی استحکام اور عوامی سہولت کے لیے ناگزیر ہے۔
